Тунис мухолифат кучлари етакчиларидан бири Муҳаммад ал-Брахмининг ўлдириши сабаб ўтказилаётган норозилик намойишини бартараф этиш вақтида иштирокчилардан бири ҳаётдан кўз юмди.

France-Presse агентлигининг хабар беришича 45 ёшли Муҳаммад Муфли полиция қўллаган кўздан ёш сиздирувчи газ канистрасининг бошига келиб урилиши оқибатида ҳалок бўлган. Ҳуқуқ-тартибот органлари бир неча юз киши махаллий маъмурият биносини штурм билан эгалламоқчи бўлганида махсус воситаларни қўллагани айтилмоқда.

Reuters агентлигининг таъкидлашича, намойиш иштирокчисининг ўлими ал-Брахми ўлдирилиши сабаб ўтказилаётган норозилик намойишларидаги биринчи қурбонликдир.

Тунисда фуқаролик жамиятини ривожлантиришга тарғиб қилиб келган Муҳаммад ал-Брахми 25 июл куни номаълум мотоциклчининг тўппончадан 11та ўқ узиши оқибатида ўз машинас салонида ҳалок бўлган. Ҳукуматдагиларнинг тахминича жиноят ортида радикал салафийлар турган бўлиши мумкин.

Ал-Брахмининг ўлдирилиши нафақат оммавий намойишларга, балки мамлакатнинг йирик касаба уюшмалари норозилигига ҳам сабаб бўлди. 26 июл куни айнан улар томонидан ўтказилган намойиш сабаб барча авиарейслар бекор қилинганди.

Manba: Darakchi.uz