Ba’zida o‘z hayotimiz bizga tegishli bo‘lmay qolgandek tuyuladi. Oila, ish va boshqa turmush tashvishlari bilan ovora bo‘lib, hatto vaqtning qayerga "yo‘qolib” borayotganligini anglamay qolamiz. Ko‘pchilik hayot zirillab o‘tib ketayotganini sezsa-da, undan qanday foydalanib qolishni bilmaydi.
Qanday qilib vaqtni to‘g‘ri taqsimlab, o‘zimiz uchun hayotning yangi ranglarini kashf etishimiz mumkin?
1. Ishga boriladigan vaqt mobaynida o‘zingiz uchun vaqt ajratish zo‘r imkoniyatdir
Albatta, bunday tig‘iz vaqtda rulda yoki avtobusning tiqilinch salonida bo‘lishingiz mumkin. Bunday vaziyatda sizga audiokitoblar, sevimli musiqalar yordam beradi. Agar o‘qish va musiqa tinglashni xohlamasangiz, atrofingizni, odamlarni kuzatishga harakat qiling. Bir necha daqiqalik hayotga bunday nazar ham yangi maqsadlarga sabab bo‘lishi mumkin.
2. Hayotda bajarayotgan vazifalaringiz o‘rtasida tanaffus qiling
Ko‘pincha biz navbatdagi vazifani boshlar ekanmiz, undan avval bajarilgani haqida hamon o‘ylayveramiz. Bu ish samaradorligini pasaytiradi. Shu bois, vazifalar oralig‘ida tanaffus qilgan ma’qul. Ana shu tanaffusda esa o‘zingiz uchun vaqt ajrating. Bir necha daqiqalarga bo‘lsa-da, ko‘nglingizda xotirjamlik hosil qiling.
3. Aloqa vositalarini o‘chirib qo‘ying
Bugungi kunda ko‘pincha qayergadir birga borish takliflari bilan turli qo‘ng‘iroqlar yoki iltimoslar bizni chalg‘itadi. Agar siz chindan ham vaqtingizni shunday o‘tishini istamasangiz, sizni bezovta qilmasliklari uchun barcha aloqa vositalarini o‘chirib qo‘ying.
Gohida hayotiy yutuqlarga erishganda, beixtiyor shodlikdan o‘zimizni qo‘yishga joy topa olmaymiz. Bu xursandchiliklar kelgusida ham davom etishi vaqtingizni to‘g‘ri taqsimlashingizga bog‘liq. Yuqoridagi maslahatlar bir qarashda, oddiy, tanishdek tuyulishi mumkin. Lekin shuni unutmaslik kerakki, hamma narsa oddiylikdan boshlanadi.
| 
