2013 йил 29 июл куни Литва пойхтахти Вильнюс шаҳрида Ўзбекистон-Литва иқтисодий ҳамкорлик бўйича ҳукуматлараро комиссиясининг тўртинчи йиғилиши  бўлиб ўтди. 

Йиғилишда Ўзбекистон Республикаси ташқи иқтисодий алоқалар, инвестициялар ва савдо вазири биринчи ўринбосари Акмал Камолов ва Литва ташқи ишлар вазири ўринбосари Андрюс Криваслар иқтисодий муносабатларни ривожлантириш борасида ўзаро фикр алмашдилар. 

Томонлар иқтисодий ва савдо алоқаларини мустаҳкамлаш ва ривожлантиришни давом эттиришга тайёр эканликларини билдирдилар, деб хабар беради Литва ТИВ матбуот хизмати.

Литва томонининг маълум қилишича, 2012 йилда иккитомонлама товар айирбошлаш 57% га ўсган ва 40,6 млн. еврони ташкил этган. Шу йилнинг январ-апрел ойиларида эса  2012 йилнинг шу даври билан таққослаганда ўсиш 3 баробарга ортган. 

Йиғилишда ахборот технологиялари, қишлоқ хўжалиги ва озиқ-овқат саноати, қурилиш материалари ишлаб чиқариш, транспорт ва тиббиёт хизмати соҳасидаги Литва компанияларининг Ўзбекистон билан ҳамкорлик қилишига урғу берилди. Бундан ташқари олий таълим муассасаларининг тўғридан-тўғри алоқаларни ўрнатиши муҳимлиги таъкидлаб ўтилди.  

Ўз навбатида Литва делегацияси транспорт соҳасида ҳамкорлик қилиш имкониятларига эътибор қаратиб, Ўзбекистонга стратегик аҳамиятга эга бўлган Клайпед порти ва Шарқ-Ғарб йўлагида юкларни ташиш учун Литва транспорт ва логистика инфраструктурасидан фойдаланишни таклиф қилди.