"Худди ўзи” лойиҳаси давом этади. Навбатдаги иштирокчи – Ойбек Алимов миллий эстрадамизга тамал тошини қўйган санъаткорларимиздан бири Ўзбекистон халқ артисти Фаррух Зокиров образида кўринишини билдирди.
Демак, иш бошланди, пардоз устаси Валя Абдуқундузова ёрдамида бу вазифа қандай уддаланганига қуйида гувоҳ бўласиз. Унгача эса Ойбекка 10та савол билан мурожаат қиламиз.
– Сиз танлаган инсон қайси сулола вакили? – Зокировлар сулоласи.
– Тўғри. "Ялла” гуруҳи нечанчи йил ташкил топган? – Аниқ эслолмайман... Лекин 30 йилдан ошди...
– 1970 йили. Яна бир маълумот Фаррух Зокиров 1976 йилдан буён гуруҳнинг бадиий раҳбари сифатида фолият кўрсатмоқда. Бу машҳур санъаткор қайси йўналишда ижод қилади? – Эстрада.
– Санъат институтининг тўлиқ номини айтинг-чи? – (узоқ ўйланиб) Ўзбекистон Давлат Санъат институти бўлса керак.
– Адашдингиз, Ўзбекистон Давлат Санъат ва Маданият институти. Ўзбекистон мадҳияси муаллифларини биласизми? – Мутал Бурхонов ва Абдулла Орипов.
– Тўғри. Ўзбекистонда ишлаб чиқарилган энг сўнгги авто русуми? – Бу саволнинг жавобини билмасам уят бўлар: "Cobalt”.
– Яна адашдингиз "ГЕНТРА”. Бу автомобил фақат Россияга экспорт қилинади. Клара Жалилованинг унвонини биласизми? – Менимча, Ўзбекистон халқ артисти, тўғрими?..
– Нотўғри, Ўзбекистонда хизмат кўрсатган артист. Оғир атлетикага қайси спорт турлари киради? Ҳеч бўлмаса биттасини айтинг. – Спорт турларидан фақат футболнигина яхши тушунаман.
– Майли, кейинги учрашувимизда сиздан оғир атлетика билан боғлиқ маълумотларни сўрайман. Яна битта савол: "Facebook” ижтимоий тармоғининг асосчиси ким? – Вай-й-й, билмайман...
– Марк Цукерберг.
Демак, биз Ойбекдан Ўзбекистон халқ артисти Фаррух Зокировни "яратишга" ҳаракат қилиб кўрдик. Натижасига ўзингиз баҳо беринг!
