Главная » 2013 » Iyun » 22 » Жаҳон чемпионати (U20): футболчиларимиз Янги Зелландияга қарши майдонга чиқишади
20:50
Жаҳон чемпионати (U20): футболчиларимиз Янги Зелландияга қарши майдонга чиқишади
Ўзбекистон ёшлар терма жамоаси 23 июнь, шанба куни Туркияда ўтказилаётган ёшлар ўртасидаги 2013 йилги жаҳон чемпионати баҳсларидаги иштирокини бошлайди.
Шу куни Аҳмаджон Мусаев шогирдлари мусобақа «F» гуруҳи 1-тур учрашувлари доирасида Океания чемпиони – Янги Зеландия ёшларига қарши майдонга тушишади. Тошкент вақти билан 19:00да бошланадиган учрашув Бурсадаги «Bursa Ataturk Stadium»da ўтказилади.
Янги Зеландия ва Ўзбекистон ёшлар терма жамоалари ўртасидаги учрашувни Антонио Ариас бошчилигидаги парагвайлик ҳакамлар бригадаси бошқариб боради. Унга қанотларда ватандошлари – Родни Акиньо ва Карлос Касерес ёрдамчилик қилади. Учрашувнинг тўртинчи ҳаками этиб гамбиялик Бакари Гассама тайинланган.
Шунингдек, Янги Зеландия ва Ўзбекистон ёшлар терма жамоалари қандай рангли либосларда тўп суришлари ҳам аниқлаб олинди. Унга кўра, «F» гуруҳи 1-тур учрашувида мезбон мақомида тўп сурадиган Океания вакиллари ўзларининг анъанавий оқ рангли либосларида ҳаракат қилишади, жамоа дарвозабони эса тўлиқ қизил рангли либосларда тўп суради.
Аҳмаджон Мусаев шогирдлари эса ЖЧ-2013нинг дастлабки ўйинини кўк рангли либосларда ўтказишади. Жамоа дарвозабонлари шу куни қора рангли либосларда майдонга чиқишади.
Шу кунларда Бурса шаҳрида ҳаво ҳарорати 30-32 даража иссиқ бўлиб турибди. Янги Зеландия ва Ўзбекистон ёшлар терма жамоалари ўртасидаги ўйин мусобақанинг бошқа ўйинларига нисбатан барвақт – 17:00да бошланиши эътиборга олинса, ҳаво ҳарорати айни қизиган вақтга тўғри келади. Шундан келиб чиқиб, ФИФА Мусобақаларни ўтказиш Регламентига асосан, ўйин давомида икки марта – 30- ва 75-дақиқаларда футболчилар учун 3 дақиқалик танаффус ташкил қилинади. Бу вақтда тўп майдонда бўлмайди ва футболчилар сув ичиб олишлари мумкин бўлади.
ФИФАнинг Бурсадаги хавфсизлик бўйича вакилининг маълум қилишича, якшанба куни бўладиган ўйинга ҳозиргача 4,7 мингга яқин чипта сотилган, бироқ ўйин куни ушбу кўрсаткич сезиларли ошиши кутилмоқда. Бундан ташқари, Ўзбекистондан ҳам юздан ортиқ ишқибозлар келиши кутилмоқда
