Главная » 2013 » Dekabr » 18 » Yangi yil bayrami kunlari xavfsizlik choralari kuchaytiriladi
08:54
Yangi yil bayrami kunlari xavfsizlik choralari kuchaytiriladi
Mamlakatimizda Yangi yil bayramini yuqori saviyada va mazmunli nishonlash, bayram tadbirlarini hamjihatlik bilan o‘tkazish borasida keng ko‘lamli ishlar amalga oshirilmoqda. Bu haqda O‘zbekiston Respublikasi ichki ishlar vazirining o‘rinbosari, polkovnik Rahmat Mamatov O‘zAga bergan intervyusida ma’lum qildi. "Ayni kunlarda Qoraqalpog‘iston Respublikasi, Toshkent shahri va viloyatlar, barcha shahar va tumanlar markazlarida, qishloq va mahallalarda, bayram tantanalari o‘tadigan hududlarda jamoat tartibini saqlash, favqulodda hodisalarning oldini olish, yong‘in hamda yo‘l harakati xavfsizligini ta’minlash yuzasidan alohida guruhlar ish olib bormoqda”, — dedi u. Shaharlar va tumanlar markazlarida ichki ishlar idoralari xodimlari va mahalla posbonlaridan iborat patrul guruhlarining hushyorligi va faolligi yanada oshirildi. Bayramni tinch va osuda o‘tkazish uchun jinoyat va huquqbuzarliklarga qarshi kurashishni yanada kuchaytirish, jamoat tartibini saqlash, jinoyat sodir etishga moyil shaxslarni aniqlab, ularga jamoatchilik vakillari bilan hamkorlikda ijobiy profilaktik ta’sir ko‘rsatish maqsadida "Tozalash – antiterror” tezkor- profilaktik tadbirlari o‘tkazilmoqda. Bayram tadbirlari o‘tkaziladigan joylarda noxush holatlarning yuzaga kelishiga yo‘l qo‘ymaslik maqsadida mahalliy hokimliklar qoshidagi ommaviy tadbirlarni o‘tkazish bo‘yicha maxsus komissiyalar a’zolaridan iborat guruhlar tashkil etilib, bayram bilan bog‘liq barcha ob’ektlarning texnik va yong‘in xavfsizligi holati atroflicha o‘rganib chiqilmoqda. Ichki ishlar, soliq idoralari, bojxona qo‘mitasi va jamoatchilik vakillaridan iborat maxsus guruhlar ishtirokida mamlakatimiz hududida pirotexnika mahsulotlarining noqonuniy muomalasiga qarshi kurashish bo‘yicha tezkor tadbirlar o‘tkazilmoqda. Bu jarayonda chegara hududlarda harakatlanayotgan avtomashina va yo‘lovchilar, chegaralar yaqinida joylashgan do‘kon va savdo rastalari, xonadon va inshootlar tekshiruvdan o‘tkazilmoqda.
