Главная » 2013»Iyun»7 » Ўзбекистондаги фаолияти тўхтатилиши «МТС»нинг чоракдаги фойдасини 17 фоизга камайтирди
22:18
Ўзбекистондаги фаолияти тўхтатилиши «МТС»нинг чоракдаги фойдасини 17 фоизга камайтирди
Россиядаги энг йирик симсиз алоқа оператори ҳисобланган «МТС»нинг 2013 йил биринчи чоракда кўрган фойдаси 17 фоизга камайган. Bloomberg ахборот агентлиги хабарига кўра, бунга компаниянинг Ўзбекистондаги фаолияти тўхтатилиши ва рублнинг қадрсизланиши сабаб бўлган.
Компаниянинг соф фойдаси 2013 йилнинг биринчи чораги давомида, ўтган йилги 15,6 миллиард рублдан 13 миллиард рубль (402 миллион доллар)гача камайган. Савдолар ҳажми умумий 2 фоизга ўсиб, 92 миллиард рублни ташкил этган.
Компания абонентларининг мобил интернет хизматларидан фаол фойдаланиши ушбу йўналишдаги компания даромадлари 37 фоизга ошишини таъминлади ва овозли хизматлардан келадиган даромаднинг камайиши ўрнини тўлдириш, шунингдек, Ўзбекистон бозоридан чиқиб кетиш ортидан келган зарарларни қоплаш имконини берди. Компания бош ижрочи директори Андрей Дубовсковнинг сўзларига кўра, мобил интернет хизматлари даромадлари бўйича «МТС» асосий рақобатчиларидан бири – «Мегафон»га деярли етиб олган.
Қайд этиш жоиз, «МТС» Россиядан ташқари, Арманистон, Беларусь, Украина ва Туркманистон мобил алоқа бозорларида ҳам ишлайди.
«МТС»нинг Ўзбекистондаги шўъбаси – «МТС-Ўзбекистон» («Ўздунробита») 2012 йил июль ойида амалда хизмат кўрсатишни тўхтатган, 2013 йил апрелида эса банкрот деб топилган эди. Компанияга қарши Ўзбекистоннинг бир қатор органлари томонидан 1 миллиард доллардан ошиб кетувчи даъволар эълон қилинган, унинг мансабдор шахслари эса Ўзбекистон қонунларини бузганлиги учун халқаро қидирувга берилган.
2013 йил июнь ойида «МТС-Ўзбекистон» активларини Жанубий Кореянинг Korea Telecom корпорацияси сотиб олишни режалаштираётгани маълум бўлди.
