Главная » 2013»Iyun»11 » Тошкентда Саид Аҳмад ва Саида Зуннуноваларнинг ҳайкали очилди
18:26
Тошкентда Саид Аҳмад ва Саида Зуннуноваларнинг ҳайкали очилди
Ўзбекистон Республикаси Президентининг 2011 йил 27 май куни қабул қилинган "Ўзбекистон Қаҳрамони, Ўзбекистон халқ ёзувчиси Саид Аҳмад ва таниқли шоира Саида Зуннунова хотирасига Тошкент шаҳрида ҳайкал ўрнатиш тўғрисида”ги қарори асосида Алишер Навоий номидаги Ўзбекистон Миллий боғида бадиий обида бунёд этилди.
Ушбу ҳайкал тимсолида собиқ мустабид тузум давридаги қийинчилик ва машаққатлар, ҳижрон ва айрилиқ азобларига қарамасдан, вафо ва садоқат намунасини кўрсатиб, оғир синовларда тобланган, гўзал бадиий асарлари орқали халқимизга хос инсонийлик, сабр-бардош ва меҳр-оқибат фазилатларига ўз шахсий ҳаётларида амал қилиб, бу туйғуларни бетакрор асарларида юксак пардаларда тараннум этиб яшаган икки улуғ ижодкорнинг ёрқин сиймоси таъсирчан бадиий -эстетик воситалар орқали ифода этилган.
Шу йилнинг 10 июнь куни – атоқли адиб Саид Аҳмад таваллуд топган кунда ҳайкалнинг тантанали очилиш маросими бўлиб ўтди. Шу муносабат билан Ўзбекистон Миллий боғига ижодкор зиёлилар, талаба ва ўқувчи ёшлар, маҳалла ва меҳнат жамоалари вакилларидан иборат кенг жамоатчилик тўпланди.
Тадбирда Ўзбекистон Республикаси Президентининг Давлат маслаҳатчиси Х.Султонов, Ўзбекистон Ёзувчилар уюшмаси раиси М.Аҳмедов, Ўзбекистон Қаҳрамони, Ўзбекистон халқ шоири А.Орипов, Ўзбекистон халқ шоири О.Ҳожиева, Саид Аҳмад ва Саида Зуннунованинг фарзанди Н.Ҳусанхўжаева ўзбек миллий адабиёти ва маданияти ривожига улкан ҳисса қўшган, бетакрор ижоди ва ибратли ижтимоий фаолияти билан ўзлигимизни англаш, ёш авлодни она Ватанга севги ва садоқат туйғуси, миллий ва умуминсоний қадриятлар руҳида тарбиялаш йўлида беқиёс хизмат қилган атоқли адибларимизга кўрсатилаётган юксак эъзоз ва эҳтиром ҳақида сўзладилар.
Маросимда Ўзбекистон Қаҳрамони, Ўзбекистон халқ ёзувчиси Саид Аҳмад ва ҳассос шоира Саида Зуннунованинг магнит лентасига муҳрланиб, тарих мулкига айланиб қолган сўзлари катта қизиқиш билан тингланди.
