Туркияда бўлиб ўтаётган футбол бўйича ёшлар ўртасидаги Жаҳон чемпионати доирасидан ўрин олган Ўзбекистон - Хорватия учрашувини шарҳлаган тележурналист Мурод Ризаев қўпол хатога йўл қўйди. Бу ҳақда uff.uz сайтида чоп этилган Одилбек Толиповнинг мақоласида маълум қилинган.
- ...Ўйинни шарҳлаб боришга унчалик ҳам тайёргарлик кўрмаган Мурод ака нега сукут сақланаётганини билмасди кўпчилик мухлислар сингари вазиятдан чиқиб кетиш учун "Америка Қўшма Штатларидаги воқеа учун сукут сақланди” деб юборди", деб ёзади муаллиф. - Америкада нима бўлганди? Марафонда бўлган теракт оқибатида ҳалок бўлганларнинг хотирасига сукут сақландими? Орадан қанча муддат ўтди марафондаги терактга? Наҳотки, ўйинни шарҳлаб боришини билиб туриб тайёргарлик кўрмаса? Биларди шекилли ўйинни шарҳлашини? Ёки учрашув бошланишига 5 дақиқа қолганида "Мурод ака, бўлинг тезроқ, ўйинни Сиз шарҳлар экансиз” деб қолишдимикин? Ўйинни шарҳлаш қўлига қоғоз ушлаб олиб, статистикани ўқиб бериш ёки "тўп у футболчидан бу футболчига оширилди” дейишдан иборат эмас-ку! Баҳс мобайнида шунча статистикаларни ўқиб бериш учун интернет оламидан бир дунё маълумот йиғибди, нега сукут сақлангани ҳақида маълумот олмади?
Муаллифнинг айтишича, хорватиялик футболчи 23 ёшли Ален Памичнинг бевақт оламдан ўтгани муносабати билан ўйиндан олдин сукут сақланган ва бу ҳақда интернетдаги сайтларда хабарлар тарқатилган.
- Лекин, телевизор орқали Хорватия-Ўзбекистон ўйинини томоша қилаётган телетомошабинларни ҳаммаси ҳам ўқимаган-ку! Ален Памичнинг ўлимидан бехабар бўлганлар "Ҳа Америка яна нимадир бўлгандир-да” деб ўзлари билан ўзлари бўлиб кетаверадими Мурод акани гапига ишониб?, деб ёзади Одилбек Толипов.
