Главная » 2013»Iyun»7 » Кучли ёмғирлар сабаб Ўзбекистон миллий терма жамоасининг Пекиндаги рейси кечиктирилди
22:17
Кучли ёмғирлар сабаб Ўзбекистон миллий терма жамоасининг Пекиндаги рейси кечиктирилди
Ўзбекистон миллий терма жамоаси футболчилари Хитойда юзага келган ноқулай об-ҳаво шароити туфайли Пекин аэропортида ушланиб қолди. Бу ҳақда Ўзбекистон футбол федерацияси матбуот котиби Санжар Ризаев ўз твиттерида маълум қилди.
Санжар Ризаевнинг ёзишича, парвозлар бекор қилинган ва ёки кечиктирилган. Ўзбекистон миллий терма жамоаси Пекинда қанча вақт туриб қолиши ҳозирча номаълум. Миллий терма жамоа делегацияси Хитойдан Жанубий Кореяга йўл олади.
Бундан аввал, 7 июнь куни, худди шу сабаб – об-ҳаво ноқулайлиги сабаб Ички Мўғулистон маъмурий маркази – Хоххотдан Пекинга учиб келишда кечиккан эди. Миллий терма жамоа бу ерга Хитой миллий терма жамоасига қарши ўртоқлик учрашувида майдонга тушиш учун келганди.
Халқаро ўртоқлик учрашуви 2:1 ҳисобида ўзбекистонлик футболчилар фойдасига ҳал бўлган. Маълумот ўрнида, ўйин вақтида ҳам ҳаво ноқулай бўлиб, бутун ўйин давомида ёмғир ёғиб турган.
Қайд этиш жоиз, ҳозирда Хитойнинг аксарияти ҳудудларини кучли ёмғирлар қамраб олган. Жумладан, мамлакатнинг шимолий ва шимоли-ғарбий минтақаларида тинимсиз уч кун ёққан ёмғир натижасида йўллар сув остида қолган, дарахтлар қўпорилган, транспорт тизимида бузилишлар рўй берган. NTD хабарига кўра, Ички Мўғулистоннинг Эргун шаҳрида сув тошқинлари рўй берган, шаҳар яқинидан оқиб ўтувчи Генье дарёси эса ўзанидан чиқиб кетган.
