Республика Марказий банки ва Ўзбекистон "Миллий тикланиш” демократик партиясининг "Банк кредитларининг оилавий тадбиркорлик ва миллий ҳунармандчиликни ривожлантиришдаги аҳамияти” қўшма лойиҳаси доирасида республикамиз бўйича 150 нафарга яқин ҳунарманд ва оилавий тадбиркорларга 4,1 млрд.сўмдан ортиқ имтиёзли кредитлар ажратилди.
Натижада 300 дан зиёд янги иш ўринлари яратилишига эришилди. Бу рақамлар Марғилон шаҳрида ташкил этилган навбатдаги семинарда айтилди.
Унда ЎзМТДП Марказий кенгаши ва унинг Олий Мажлис Қонунчилик палатасидаги фракцияси аъзолари, республика "Ҳунарманд” уюшмаси ва тижорат банклари раҳбарлари, вилоят ҳунармандлари иштирок этди.
Халқ амалий санъати ва ҳунармандчилик маҳсулотлари кўргазмаси билан бошланган анжуманда соҳа тараққиёти учун яратиб берилаётган қулайлик ва имтиёзлар, ҳуқуқий асослар, банк хизматлари, мавжуд муаммолар, усталарнинг қизиқиш ва эҳтиёжлари атрофлича муҳокама этилди.
Партия етакчилари банк кредитларининг миллий ҳунармандчилик, оилавий тадбиркорлик ва касаначиликни қўллаб-қувватлаш ва "устоз-шогирд” мактабини ривожлантириш бўйича белгиланган вазифаларни амалга оширишга қулай шароит яратаётганини эътироф этдилар.
Семинар давомида вилоятдаги 54 нафар ҳунарманднинг 966,2 млн. сўмга тенг лойиҳалари тижорат банкларининг имтиёзли кредит ажратиш ҳуқуқини берувчи сертификатига муносиб деб топилди. Мазкур кредит маблағлари ёрдамида 30 нафар ҳунарманд ўз фаолиятини кенгайтириш, 20 нафарга яқин коллеж битирувчиси тадбиркорлик фаолиятини бошлайди. Натижада 100 дан ортиқ янги иш ўринлари яратилади.
Мазкур лойиҳа доирасида бундай семинарлар ўтган ойларда Қорақалпоғистон Республикаси, Андижон, Самарқанд, Хоразм, Наманган, Сурхондарё ҳамда Бухоро вилоятларида ҳам ташкил этилган эди.
