Главная » 2013 » Iyun » 1 » Июнда гиёҳвандликка қарши ойлик ўтказилади
06:57
Июнда гиёҳвандликка қарши ойлик ўтказилади
Мамлакатимизда бир неча йиллардан буён июн ойи гиёҳвандликка қарши кураш ойлиги ҳисобланади.
Жорий йилда ҳам мазкур ойлик давомида мамлакатимизнинг барча ҳудудларида кенг кўламли профилактика ишларини амалга ошириш режалаштирилган, деб хабар беради ЎзА.
Ойлик наркотик моддаларни суиистеъмол қилиш ва уларнинг ноқонуний айланишига қарши курашиш бўйича 2011-2015 йилларга мўлжалланган комплекс чора-тадбирлар дастури доирасида ўтказилади.
Наркобизнесга қарши курашишда БМТнинг Наркотик воситалар ва психотроп моддаларнинг ноқонуний айланишига қарши курашга доир конвенцияси муҳим аҳамият касб этади. Мазкур Конвенцияга аъзо давлатлар қабул қилган резолюцияга мувофиқ, 1987 йилдан бошлаб 26 июнь Халқаро наркотик моддаларни суиистеъмол қилиш ва уларнинг ноқонуний айланишига қарши кураш куни сифатида белгиланган.
Мазкур ойлик давомида биринчи навбатда, наркотик моддаларни суиистеъмол қилиш билан боғлиқ ҳуқуқбузарликларнинг олдини олишга қаратилган тарғибот ишларини амалга ошириш кўзда тутилган.
Тошкент шаҳри, вилоятлар марказлари, йирик шаҳарларда санъаткорлар, спортчилар, жамоат арбоблари иштирокида хайрия концертлари ўтказилади. Ёшлар учун гиёҳванд моддаларни суиистеъмол қилиш ва ОИВнинг ҳалокатли оқибатларига бағишланган ижтимоий роликлар, туркум радиоэшиттиришлар ва телекўрсатувлар эфирга узатилади, газета ва журналларда мақолалар чоп этилади. Кинотеатрларда гиёҳвандликнинг зарари ҳақида ҳикоя қилувчи бадиий ва ҳужжатли фильмлар намойиш этилади. Соғлом турмуш тарзини тарғиб қилиш шиори остида ёшлар орасида спорт мусобақаларини ўтказилади ва ғолиблар совғалар билан тақдирланади.
Ўзбекистонда наркотик моддаларнинг ноқонуний айланишига қарши кураш ва гиёҳвандликнинг олдини олиш борасида амалга оширилаётган давлат сиёсати ва чора-тадбирларни халқаро ҳамжамиятга намойиш этиш мақсадида мамлакатимизнинг чет элдаги дипломатик ваколатхоналарида учрашувлар ташкил этилади.
Бу ишларга Ўзбекистон Республикаси Вазирлар Маҳкамаси ҳузуридаги Наркотик моддаларни назорат қилиш миллий ахборот-таҳлил маркази ва унинг ҳудудий комиссиялари, ҳуқуқни муҳофаза қилиш органлари, давлат ва жамоат ташкилотлари, маданият, тиббиёт, спорт муассасалари, хайрия жамғармалари, БМТнинг Марказий Осиёда Наркотиклар ва жиноятчилик бўйича бошқармасининг Минтақавий ваколатхонаси ҳамда оммавий ахборот воситалари кенг жалб қилинади.
