Главная » 2013 » Iyun » 2 » Эндокринология соҳаси диққат марказда
22:26
Эндокринология соҳаси диққат марказда
Ўзбекистон Миллий матбуот марказида эндокринология соҳасида амалга оширилаётган ислоҳотлар самаралари ва истиқболдаги вазифаларнинг ижросига бағишланган матбуот анжумани бўлиб ўтди, бу хақда ЎзА хабар беради.
Тадбир Ўзбекистон Соғлиқни сақлаш вазирлиги ва Республика ихтисослаштирилган эндокринология илмий-амалий тиббиёт маркази ҳамкорлигида ташкил этилиб, унда олимлар, эндокринология диспансерлари ва бирламчи тиббий-профилактика тизими шифокорлари иштирок этди.
Тадбирда таъкидланганидек, бугунги кунда мамлакатимизда аҳолига сифатли эндокринология ёрдами кўрсатилмоқда. Замонавий тиббий ташхис ва даволаш ускуналари билан жиҳозланган Республика ихтисослаштирилган эндокринология илмий-амалий тиббиёт марказида йилига 60 минг беморга амбулатор, 7 минг беморга стационар шароитда кўмак берилмоқда.
Соҳага илғор илм-фан ютуқлари жорий қилинаётгани натижасида гипофиз бези, қалқонсимон без хасталиклари, қандли диабет асоратлари туфайли келиб чиқадиган буйрак етишмовчиликлари ва бошқа оғир хасталиклар самарали даволанмоқда. Бу эса ногиронликнинг олдини олиш, беморлар саломатлигини яхшилашга хизмат қилмоқда.
Аҳоли йодланган ош тузи билан таъминланаётгани эндокринологиянинг долзарб муаммоларидан бири – қалқонсимон без хасталигининг олдини олишда яхши самара бермоқда. Қандли диабетнинг биринчи тури билан хасталанганларга давлат бюджети ҳисобидан инсулин етказиб бериш йўлга қўйилган.
Матбуот анжуманида эндокринологик касалликларни камайтириш учун ҳар бир инсоннинг ўз саломатлигига масъуллигини ошириш, аҳоли ўртасида соғлом турмуш тарзини кенг тарғиб этиш юзасидан атрофлича фикр алмашилди. Журналистларни қизиқтирган саволларга батафсил жавоб қайтарилди.
