Главная » 2013 » Iyun » 16 » «Билайн-Ўзбекистон» ва Ucell Монополияга қарши кураш давлат қўмитаси устидан судга даъво берди
22:47
«Билайн-Ўзбекистон» ва Ucell Монополияга қарши кураш давлат қўмитаси устидан судга даъво берди
«Билайн-Ўзбекистон» ва Ucell монополияга қарши кураш идорасининг қарори устидан Тошкент шаҳар хўжалик судига даъво аризаси билан мурожаат қилди. Бу ҳақда «РИА Новости» ахборот агентлиги суд вакилига асосланиб хабар берди, дея хабар бермоқда «Новый век» газетаси.
GSM стандартида ишловчи Ўзбекистоннинг икки мобил алоқа оператори – «Билайн-Ўзбекистон» ва Ucell, Хусусийлаштириш, монополиядан чиқариш ва рақобатни ривожлантириш давлат қўмитаси уларни монопол компаниялар рўйхатига киритгани устидан шикоят қилиб судга мурожаат қилган.
«Куни кеча алоҳида суд маҳкамалари бўлиб ўтди ва унда операторларнинг даъволари кўриб чиқилди», – дейди агентлик манбаси. Суд қарори билан, даъволар бўйича қўшимча ҳолатларни ўрганиб чиқиш учун, суд мажлиси 26 июнга кўчирилган.
Май ойи бошида Ўзбекистон Хусусийлаштириш, монополиядан чиқариш ва рақобатни ривожлантириш давлат қўмитаси икки мобил операторни Ўзбекистон алоқа бозорида устун мавқега эга ширкатларнинг давлат рўйхатига киритилгани ҳақида хабар тарқатган эди. Қўмита маълумотларига кўра, «Билайн-Ўзбекистон»нинг Ўзбекистон мобил алоқа бозоридаги улуши 54 фоизни, Ucell’ники эса 41 фоизга тенг. Ўзбекистон қонунчилигига кўра, бозордаги улуши 65 фоизга етган, шунингдек, алоҳида белгиланган ҳолатларда эса, улуши 35 фоиздан 65 фоизгача бўлган хўжалик юритувчи субъектлар монопол компаниялар рўйхатига киритилиши мумкин.
«Ҳозирги вақтда Ўзбекистон ҳуқуқшунослигида устун мавқе шартларини аниқ белгилаб берадиган ёзиб қўйилган механизм йўқ. Бизнинг ҳолатимизда ҳам худди шундай ва шунинг учун ҳам биз ушбу қарор устидан шикоят қилдик ва барча қонуний воситаларни ишга солиб, унинг бекор қилиниши учун ҳаракат қиламиз», – деди «Билайн-Ўзбекистон» вакили «РИА Новости»га берган интервьюсида.
Май ойида қўмита икки операторни, 2012 йилдан бошлаб келишиб олган ҳолда абонент тўлови ва тариф режалари нархларини оширишда айблаб чиққан ва умумий 30 миллион сўмлик жарима ёзган эди. Операторлар ушбу қарор устидан қўшита раҳбариятига шикоят тақдим этишган, шикоят ижобий қониқтирилмаса, ҳар иккала оператор ҳам қўмитани судга бериш ниятида.
Аввалроқ, «Билайн-Ўзбекистон» вакиллари Ўзбекистон қонунчилигида «бир вақтда» деган атамаларни аниқ муддат билан белгилаб қўйилмаганини қайд этиб ўтишган эди. Операторларнинг фикрларича, 2012 йил декабрида телекоммуникация ускуналарини олиб киришга нисбатан 30 фоизлик божхона имтиёзларининг бекор қилиниши кўрсатилаётган хизматлар нархининг ошишига сабаб бўлган.