Главная » 2013»Yanvar»8 » Жорий солиг тўловларини хисоблаш учун янги шакллар жорий этилди
04:22
Жорий солиг тўловларини хисоблаш учун янги шакллар жорий этилди
Ўзбекистон Молия вазирлиги ва Давлат солиқ қўмитасининг 30.12.2012 йилдаги қўшма хати билан юридик шахсларнинг мулк солиғи ва сув захираларидан фойдаланганлик учун солиқ бўйича жорий тўловларни ҳисоблаш учун маълумотномаларнинг янги шаклларини белгилади. Ушбу маълумотномалар 25.12.2012 йилда қабул қилинган №ЎРҚ-343 сонли қонун томонидан Солиқ Кодексининг 264 (сув захираларидан фойдаланганлик учун солиқ) ва 271- моддаларига (юридик шахсларнинг мулк солиғи) киритилган ўзгаришлар муносабати билан тақдим этилади. Бироқ, солиқ тўловчилар (хусусан, водопровод тармоғидан фойдаланувчилар) шуни назарда тутишлари керакки, сув захираларидан фойдаланганлик учун жорий солиқ тўловларини ҳисоблаш учун Маълумотномани солиқ органларининг ёрдамисиз тўғри тўлдира олишмайди. Гап шундаки, сув захиралари бўйича солиқ ставкаси уларни олиш манбаига боғлиқ. Манбалар эса иккита: ер усти ва ости сувлари. Солиқ тўловчилар ер усти ва ости манбаларидан фойдаланилган сув захираларининг ҳажми бўйича алоҳида ҳисобни юритишлари ва ҳар бир манба бўйича алоҳида солиққа тортиладиган базани аниқлашлари керак. Водопровод тармоғига тушувчи сув ҳажмларининг нисбатини сув етказиб берувчи юридик шахслар белгилайди. Айнан улар солиқ органларига ер усти ва ости сувларидан водопровод тармоғига тушувчи сув ҳажмларининг нисбати тўғрисидаги маълумотларни жорий солиқ даврининг 15 январига (2012 йилда белгиланганидай, 1 февралгача эмас) қадар тақдим этишлари керак. Ўз навбатида, солиқ органлари ушбу маълумотларни солиқ тўловчиларга 5 кун ичида етказишлари шарт. Мазкур маълумотлар олинганидан кейингина, солиқ тўловчи талаб этиладиган Маълумотномани тўғри тўлдириши мумкин. Мулк солиғи бўйича Маълумотномани тўлдириш осонроқ – барча маълумотлар солиқ тўловчининг ўзида, яъни бухгалтерлик ҳисобида бўлади. Аммо 2013 йил 1 январдан номоддий активлар (НМА) объектлари солиқ тортиладиган объектдан чиқарилган (СК 267-моддаси). Шунга мос равишда, 2013 йил 1 январдан мулк солиғи бўйча солиққа тортиладиган база НМАнинг ўртача йиллик қолдиқ қийматисиз ҳисобланади. Мулк солиғи борасидаги яна бир янгилик – солиқ давридаги жорий тўловлар суммасининг ҳисоб бўйича бюджетга тўланиши керак бўлган солиқ суммасидан 10% дан кўп миқдорда камайтириб кўрсатилган тақдирда қўлланиладиган санкциялардир. Биринчидан, солиқ органи ҳақиқий солиқ суммасидан келиб чиққан ҳолда жорий тўловларни қайта ҳисоблаб чиқади, иккинчидан, унга пеня ёзади.
