Главная » 2013»Oktyabr»2 » Ўзбекистон ўсмирлар терма жамоаси Осиё чемпионатига йўл олди
09:49
Ўзбекистон ўсмирлар терма жамоаси Осиё чемпионатига йўл олди
Тошкентда ўтказилган футбол бўйича Осиё чемпионати cаралаш мусобақасининг "В” гуруҳи ўйинларида Ўзбекистон ўсмирлар терма жамоаси муваффақиятли иштирок этди.
Темур Олимхўжаев шогирдлари дастлабки учрашувда Фаластин ўсмирлар терма жамоаси дарвозасига жавобсиз тўққизта гол ургани ҳақида хабар бергандик.
Гуруҳдаги иккинчи баҳсда ҳамюртларимиз Яман ўсмирларига қарши майдонга тушди. Футболчиларимиз устунлигида ўтган беллашувда 4:0 ҳисоби қайд этилди. Рақиб жамоа дарвозасига киритилган голлардан иккитаси Жонибек Кўчимов, қолганлари Маъруф Жўраев ҳамда Шоҳруҳ Маҳмудҳожиев ҳисобига ёзилди – 4:0.
"В” гуруҳидаги ҳар икки учрашувни ўз фойдасига ҳал қилиб, биринчи ўринни эгаллаган Ўзбекистон ўсмирлар терма жамоаси 2014 йилнинг 18 сентябрь – 1 октябрь кунлари Таиландда ўтказиладиган Осиё чемпионатининг финал қисмида иштирок этиш ҳуқуқини қўлга киритди.
Бўлажак қитъа чемпионатида Осиёнинг энг кучли 16 терма жамоаси совринли ўринлар ва 2015 йили 17 ёшгача футболчилар ўртасида ўтказиладиган жаҳон чемпионатига бериладиган тўрт йўлланмадан бирини қўлга киритиш учун ўзаро рақобатлашади.
