Иорданияга қарши ЖЧ-2014 саралаши, плей-офф учрашувларига тайёргарлик кўраётган футбол бўйича Ўзбекистон миллий терма жамоаси 2 сентябрь куни тўлиқ таркиб билан машғулотларга киришди.

Миржалол Қосимов бош мураббийлигидаги Ўзбекистон миллий терма жамоаси 28 август куни Тошкентда Иорданияга қарши плей-офф учрашувларидан олдинги йиғинини бошлаган эди. Ўтган дам олиш кунлари ҳориж чемпионатларида тўп сураётган миллий терма жамоа аъзолари тур учрашувларида майдонга тушишди ва 2 сентябрь куни Тошкентдаги йиғинга қўшилишди. Эслатиб ўтамиз, миллий терма жамоа бош мураббийи Миржалол Қосимов 6 ҳамда 10 сентябрь кунлари Иордания миллий терма жамоасига қарши бўлиб ўтадиган учрашувлар учун жами 25 нафар футболчини терма жамоа йиғинига жалб этган.

Таъкидлаш жоиз, Ўзбекистон миллий терма жамоаси делегацияси 6 сентябрь куни Амман шаҳрида бўлиб ўтадиган плей-оффнинг дастлабки ўйинида иширок этиш учун 5 сентябрь куни Иордания пойтахтига чартер рейс билан учиб кетади. Бу ҳада ЎФФ матбуот хизмати бошлиғи Санжар Ризаев хабар берган. ЖЧ-2014 саралашида Иорданияга қарши кечадиган учрашув якунлангани ҳамон терма жамоа орқага қайтади. 

Аммандаги учрашув Тошкент вақти билан 21:00да бошланади. Ўзбекистон ҳамда Иордания миллий терма жамоалари ўртасидаги плей-оффнинг жавоб учрашуви 10 сентябрь куни Тошкентдаги «Пахтакор» стадионида ўтказилади.