Ўзбекистон ва Қирғизистон чегара хизматлари апрель ойи охирида чегаравий муаммоларни ҳал этиш бўйича учрашув ўтказишади. Бу ҳақда, қирғиз ОАВига асосланиб, CA-News хабар бермоқда.
Агентликнинг Қирғизистон Давлат чегара хизмати раиси Токон Мамитовга сўзларидан иқтибос келтиришича, Қирғизистон ва Ўзбекистон ўртасидаги чегара муносабатлари сезиларли даражада яхшиланган. «Бу йил Ўзбекистон-Қирғизистон чегарасида ўқотар қуроллар иштирокида бирорта ҳолат қайд этилмади. Бу бизнинг Ўзбекистон чегара хизматлари билан мулоқотларимиз самарасидир», – деди Мамитов.
Агентликнинг қайд этишича, 2013 йилда чегарада бирорта баҳсли ҳолат қайд этилмади деб, Мамитов иккилантириб қўйган. Январь ойида, Ўзбекистон томонининг маълум қилишича, қирғиз чегарачиларининг ноқонуний хатти-ҳаракатлари кетидан нохуш ҳолат юзага келиб, қирғиз чегарачиларининг ўт очиши оқибатида беш нафар Ўзбекистон фуқароси тан жароҳати олган эди.
Маълумот ўрнида, 2013 йилнинг 25-28 март кунлари Тошкентда Чегараларни демаркация ва делимитация қилиш бўйича Ўзбекистон-Қирғизистон ҳукумат комиссияси мажлиси бўлиб ўтган эди. Чегарага оид бир қатор масалалар муҳокама қилинган мажлисда Ўзбекистон томондан бош вазир биринчи ўринбосари Рустам Азимов, Қирғизистондан эса бош вазирнинг хавфсизлик, тартибни сақлаш ва чегара масалалари бўйича ўринбосари Шомил Отахонов иштирок этган эди.
CA-News’нинг ёзишича, 1991 йилдан бери Ўзбекистон ва Қирғизистон ҳукумат делегациялари даражасида чегараларни делимитация қилиш бўйича 8та мажлис ўтказишган, бироқ баҳсли ҳудудларнинг бир километри бўйича ҳам маъқул ечимга кела олишмаган.
