Главная » 2013 » Dekabr » 20 » WhatsApp foydalanuvchilari soni 400 millionga yetdi
21:45
WhatsApp foydalanuvchilari soni 400 millionga yetdi
Dunyo bo‘yicha WhatsApp lahzali xabar almashish dasturi foydalanuvchilari soni 400 millionga yetdi. Bu haqda servisning asoschisi va bosh direktori Yan Koum WhatsApp rasmiy blogida ma’lum qildi.
Xabarda keltirilishicha, so‘nggi to‘rt oy ichida dasturdan foydalanuvchi kishilar 100 million nafarga ko‘paygan. Bunda WhatsApp’da shunchaki ro‘yxatdan o‘tgan kishilar emas, balki undan har oy faol foydalanadiganlar hisobga olingan. "Hali hech qaysi mobil messenjerda bunday ko‘rsatkich qayd etilmagan”, — deb yozadi Yan Koum.
Eslatib o‘tamiz, oktabrda ikki oy ichida WhatsApp messenjerining oylik auditoriyasi 50 millionga ko‘payib, 350 millionni tashkil etgani haqida xabar bergan edik.
2013-yilning avgustida e’lon qilingan statistik ma’lumotlarga ko‘ra, WhatsApp dasturi orqali har kuni 31 milliard dona xabar va 325 million fotosurat yuboriladi.
Eslatib o‘tamiz, WhatsApp dastur ichida reklama ko‘rsatmasligi bilan taniqlidir. Biroq "Bilayn-O‘zbekiston” tijorat direktori Dmitriy Grigoryev uni reklama ko‘rinishida keraksiz trafik yuborish orqali abonent hisobidagi trafikni ayovsiz "yeyish”da ayblagan edi. Bunga javoban WhatsApp asoschisi va bosh direktori Yan Koum dasturga reklamalar joylashtirilmasligini va dastur hech qanday "reklama ko‘rinishidagi keraksiz trafik”ni yemasligini ma’lum qilgan edi.
