SHERLAR.BIZ Sheshanba, 17.09.2019, 13:58
Приветствую Вас Mehmon | RSS
Меню сайта
Категории раздела
Latifalar [11]
Primyeralar [12]
Mobil telfonlar [197]
Sevgi dunyosi [826]
Qo'shiq matni [94]
Texnogoliyalar [98]
Kino yangiliklari [71]
Jahon yulduzlari [58]
Dunyo xabarlari [706]
Salomatlik sirlari [13]
Sport yangiliklari [589]
O'zbek yulduzlari [130]
Shou biznes olami [575]
Foydali maslahatlar [253]
Taomlar retseptlari [6]
Yulduzlar biografiya [59]
Qiziqarli malumotlar [697]
O`zbekiston Yangiliklari [641]
Munajjimlar bashorati 2017, 2018, 2019 / Мунажжимлар башорати 2017, 2018, 2019 [0]
Yangi qo'shiqlar 2017, 2018 [0]
Yangi mp3lar 2017, 2018 [0]
25-May bitiruvchilar kuni uchun she'rlar [1]
Ramazon tabriklari / Ro'za haqida she'rlar tilaklar [1]
Onalar haqida juda tasirli she'rlar / Manoli / Mazmunli [1]
Do'stlik haqida sherlar / Yaxshi va yomon do'stlar haqida she'rlar to'plami [1]
Наш опрос
Sayt haqida fikringiz
Всего ответов: 264
Мини-чат
Статистика


Hozirda saytda: 5
Mexmonlar: 5
Foydalanuvchilar: 0
Главная » 2013 » Aprel » 6 » Қудамнинг яна бир қизини келин қилдим
23:41
Қудамнинг яна бир қизини келин қилдим
«Худога шукр, келиндан ёлчидим…» Бу гапимни эшитган қайнонажонларнинг менга ҳаваси келиши табиий. Ахир, келин ҳам худди лотерея каби, омадинг келадими, келмайдими аввалдан билмайсан киши. Келингинам тарбияли, қўл-оёғи чаққонгина. Меҳмон келса гапга чечан, бошқа пайт худди балиқ каби жим. Уйдаги масаллиқни йўқдан бор қилиб берадиган даражада пазандилигини айтмайсизми? Ишқилиб кенжатойимда ҳам худди шу келиним каби адашмайин-да. Ўйлаб қарасам, уйлантирадиган вақт келган. Тез орада чет элдаги ўқишини битириб қайтади. Маслаҳатлашиш учун синглимга қўнғироқ қилдим. Иккаламиз таниш-билишларнинг узатиладиган ёшдаги қизларини чиғириқдан ўтказа бошладик...

Синглим бир таклиф киритди:

— Опа, қудангизнинг яна бир қизи бор-ку. Ҳарҳолда билган жойингиз, иккалангиз ҳам синашта бўлсангиз.

— Қудамнинг қизи жуда мос, лекин онасини шиорини билмайсан. Бир уйга битта қиз узатаман деб биздан аввал қўшалоқ келин тушираман деб келган совчиларни қайтарган. Яқинда худди шу гапининг тўғри эканини исбот қилувчи иш бўлди. Яқин қўшниси эгизак қизини ака-укага узатган экан, синглисининг турмуши бўлмаганига опасини ҳам қайтариб олиб келишибди.[www.JPG.uz-saytdan olindi]

— Қаёқдаги гапларни гапирасиз-да. У оила бошқа, сизники бошқа. Қўшнисининг қудаси аҳмоқ бўлса, сиз иккита келинни эплай олмайсиз, деб ким айтди?

— Ростдан ҳам ўйлаб қарасам, қудамнинг иккинчи қизи ҳам опасидан қолишмайди. Қолаверса, жуда кўҳлик, бўй-басти худди кенжатойимга мос, баландгина. Хаёлимни гўшакнинг у тарафида жавраб турган синглим бўлди:

— Қудангизнинг шиори шу бўлса, уни ўзгартиринг. Наҳотки, у ҳам кенжа қизининг бахтини ўйламаса. Кўзини очинг, опа, берса сиздек хонадонга беради қизини.

Биринчи макр

— Алло, қудажон. Соғлиқларингиз яхшими?

— Раҳмат, опа. Ўзингиз тузукмисиз?

— Нимасини айтасиз, тунов куни терлаб туриб ҳовлига юпқа кийимда чиққанимгами, белим оғриб қолибди. Бу ёқда қизингизни эндигина кичик чилласи чиққан бўлса...

— Қўяверинг, секин-аста ишини қилаверади. Сиз соғлиғингизни ўйланг.

— Нималар деяпсиз? Белим оғриди деб куни кеча туққан келинимни чилласи чиқмасидан ишга солсам инсофдан бўлмас. Менинг уйимда нимаям иш бор. Шу икки маҳал овқат билан чақалоқнинг кир-чирини ювсам бўлди.

— Қўйинг, опа, шунгаям уриниб ўтирманг. Ҳализамон синглиси ўқишдан қайтиб қолади. Қарашгани юбораман.

Макрим иш берганидан ичимдан севиниб қўйдим. Энди қизгинанинг ёнида бел оғриғини ўхшатиб баҳона қилишим керак. Бирор соатлардан кейин уйга қудамнинг иккинчи қизи Ноила кириб келди. Бай-бай-бай, оёғи олти, қўли етти. Бирпасда хамир қориб тугмачадек чучвара тугишга тушди. Гапга солсам опасидан ўтадиган балиқ, уялиб ёзилиб гаплашмаяпти. Четдан кузатиб меҳрим товланиб кетди. Сеними шошмай тур, ҳали меҳрингни қозонмасамми...

— Ноилахон, мана шу интернет тушмагурни сен ҳам тушунасанми?

— Тушунаман, қуда ҳола.

— Ёқиб берсанг, ўғлим билан бир гаплашардим-да. Илгари опанг ёқиб берарди, ҳижжалаб бўлсаям хат ёзишни ўрганиб олгандим. Энди чақалоғига қараб туни билан мижжа қоқмагандир, айтишга хижолат бўляпман.

— Мен ёқиб бераман, фақат паролини айтсангиз бўлди.

— Мана бу қоғозчага ёздириб олгандим.

Бир пасда компьютер ҳам ёқилди. Омадим бор экан, ўғлим ҳам алоқага тез чиқа қолди.

— Ноила қизим, кел, мен ҳижжалаб ёзгунча ёнингда айтиб турай, ўзинг ёзиб ташлайсан. У ерда хатимни кутиб ўғлим ҳам хуноб бўлмайди.

Қўлимга елпиғични олганча "хў-ўш”, дея гап бошладим. Ўзимча ўғлимга етказиш зарур бўлган гапларни ўйлашга тушдим:

— Ёз, қизим! Болажоним яхшимисан? Овқатингнинг мазаси яхшими? Кўча-кўйда ўртоқларингга қўшилиб бўлар-бўлмас хом-хатала нарсаларни емагин. Иложи борича ўзбек миллий таомлари деган ресторан топиб ўша ерга боринглар. Ҳарҳолда ошқозонинг ўрганган таом. Ҳм, Зуфар ўртоғинг бор эди-ку, қўшнимиз Халима холанинг ўғли, шуни фотиҳа қилишди. Бир ойдан кейин тўй. Яхши ният қилдим, насиб қилса сен ҳам қайтсанг даданг билан тўйингни қилардик.

Елпиғични зўр бериб айлантирганча киришиб кетибманми, узундан узоқ хатлар ёғила бошлаган ўғлимдан биргина жавоб келди:

— Ойи, компьютерда тез ёзишга уста бўлиб кетибсизми?

— Ёз, қизим. А, йўғ-э, мен эмас, келинойингнинг синглиси айтганларимни ёзиб турибди. Исми Ноила, ўзи жуда яхши қиз.

Ноила ёзишдан тўхтаб қизарганча менга қаради:

— Қуда хола, шу, ҳалиги... Бунисини ёзиш шартми?

Иккинчи макр

Қудажонимдан айланай. Ўйлаб қўйган режамдан бехабар ўзи менга маслаҳат билан қўнғироқ қилди:

— Опа, Ноилага бир жойдан совчи чиққанди. Суриштириб билсам куёвимнинг ўртоғининг қариндоши экан. Тўғриси, қанақа одамлар экан билмайману, бегона одамдан сал чўчир экан киши. Катта қизимда омадимиз келди, худога шукр, энди бунисиям яхши жойга тушсин дейман-да.

— Ҳечам хижолат бўлманг, ҳали Анваржон ишдан келганида ўзим яхшилаб суриштираман. Ноила ҳам ахир қизимдек.

Ишдан қайтган ўғлимдан куёвликка даъвогар йигитни тоза суриштирдим. Рад жавобини беришга арзигулик ҳеч нарса йўқ экан. Оиласи ўзига тўқ, йигит ўрнини топган, тадбиркор экан. Оилада битта ўғил экан. Иккита катта қизи узатилган эмиш. Фақат... ўғлим бир оз чайналганини кўриб кўзларим ёнди:

— Гапираверсанг-чи, ахир Ноила бизга бегона эмас, қайнисинглинг бўлади.

— Йигитни кўришганми? Ноиланинг бўйи йигитдан анча баланд шекилли, яна ўзлари билишади.

Қудамга қўнғироқ қилдим:

— Бўйи пастлигини айтмаса ёмон жой эмас.

Шу-шу қудам келадиган совчиларни мен билан маслаҳатлашиб кутадиган бўлди. Таниш-билишларим кўп эмасми, уларни ишга солиб келган совчиларни суриштиришга ёрдамлаша бошладим:

— Йигитни исми Анварми? Холамнинг қизини маҳалласида турар экан. Айтишича келин туширса ўқитмас эмиш... Ҳошимжон? Қудангизни бир улфати унинг тоғаси экан. Жуда катта даргоҳ, қассобларнинг оиласи. Йигит етти қиздан кейин туғилган яккаю ягона ўғил. Бирдан уйга йиғилишса Ноила қизимга қийин бўлмасмикан?.. Абдурашидми? Э-ҳа, уни яхши танийман. Қизлик маҳалламдаги қўшним бўлади. Йигит яхши, аммо онаси тўғри келмайди. Маҳаллада ёзғувчи деб ном чиқарган. Доим ҳаммани устидан юқори ташкилотларга шикоят ёзади. Майда гап.

Учинчи макр

— Ноилахон, мана бу туфлини бир кийиб кўринг.

— Нимага?

— Келинимга сарпо қилиб олиб қўймоқчиман. Оёққа кийганда қанақа тураркин?

Қиз менга ҳайрон тикилди. Кулиб юборай деб туриб ўзимни аранг босдим:

— Ажабланманг, ахир ўғлим чет элдан келишига бир ой қолди. Бу ёғига дарров келин топиб уйлантириб қўямиз. Сарпо тайёр турса ўзимга осон бўлади.

— Қуда хола, бўлажак келинингизга пойабзал ўлчами мос тушмаса-чи?

— Келин қиламану, оёқ ўлчамини билмайманми? Тахминан сиздек бўлар, ундан гавдалиси тўғри келмайди. (Ҳазилга бурдим) Жуда бўлмаса Золушкага ўхшаб туфлини кийдириб келин танлаб қўя қоламиз.

Шу тариқа Ноилани бизникига келган пайтлари ўзим билан бозорга олиб юрадиган бўлдим.

— Барака топинг, ёшларбоп матоларни танлай олмайман. Ёрдамлашиб юборинг.

Бошқа бир гал шунга ўхшаш баҳона топдим:

— Фотиҳага мослаб оқ рангда костюм-юбка олишим керак. Бўлажак келинимнинг кўйлак бичими тахминан сизникидек бўлар, ундан ортиқ тўлачаси ўғлимга ёқмайди. Ўз ўғлимни дидини билмайманми?

Сарпо деярли тахт бўлганида қудам ҳаяжонланиб қўнғироқ қилди:

— Опа, бу Ноила тушмагур куни кеча келган совчига учрашувга чиқмайман деяпти. Энди нима қилдим?

— (Ичимдан севиндим) Нега чиқмасмиш?

— Айтишича, ёқтиргани бор экан. Қудангизга буни қайси тил билан айтаман? Бу интернет ўлгурга ўт тушса бўлмасмиди? Ярим йилдан бери ёзишаётган бир дўсти яқинда ўқишим битиб чет элдан қайтаман, сен турмушга чиқиб кетма, ўзим совчи қўяман деган эмиш. Ахир уни насл-насаби ким, қанақа оиланинг боласи эканини билмасак. Қолаверса, уйда интернет йўқ, қаёқдан бу бола билан дўстлаша қолди экан, ҳеч нарсани тушунмаяпман.

Ноила ўқишдан қайтгач, бизникига кирмоқчи экани ҳақида қудамга эслатиб тинчлантирдим:

— Хавотир олманг, ўзим қизингиздан аста сўраб оламан. Бу ёғини ўзимга қўйиб беринг, қудажон.

Кўча тарафдан Ноиланинг овози эшитилди:

— Қуда хола-а-а...

Ўзимча: «Тилларингдан айланай, ойижон, де, қизим, энди ойижонинг бўламан...» — дедим.

Нигора СОЛИҲОВА
Категория: Qiziqarli malumotlar | Просмотров: 593 | | Рейтинг: 5.0/3
Всего комментариев: 1
Добавлять комментарии могут только зарегистрированные пользователи.
[ Регистрация | Вход ]
Вход на сайт

Ro'yxatdan o'tish
Parolni unutdingizmi?
Поиск
Календарь
Архив записей
Друзья сайта
  • Официальный блог
  • Сообщество uCoz
  • FAQ по системе
  • База знаний uCoz
  • Copyright MyCorp © 2019Хостинг от uCoz