Главная » 2013 » Aprel » 29 » "Трастбанк" тошлавҳасидаги хато талабанинг мурожаати билан тўғрилаб қўйилди
01:36
"Трастбанк" тошлавҳасидаги хато талабанинг мурожаати билан тўғрилаб қўйилди
Тошкент Давлат юридик институти талабаси - блоггер Хушнудбек Худойбердиев "Трастбанк" ХОАБ банкига муассаса тошлавҳасидаги хато ҳақида хат ёзди.
"Яқинда иш билан "Ўрда” даҳаси томонларга йўлим тушганди. Йўл-йўлакай ўша даҳада жойлашган "Трастбанк” хусусий очиқ акциядорлик биржа банкининг Республика биноси олдига қўйилган тошлавҳага кўзим тушди. Тошлавҳада ёзилган банк номида баъзи имловий хатоликлар мавжудлигини бир қарашда пайқаш унчалик қийин эмасди.
Тошлавҳани кўрдим-у, хаёлимга бир фикр келди. Одатда имловий хатоларни кўрганда кўпинча кимларнидир саводсизликда айблаймиз, устидан куламиз ёки пичинг ва истеҳзоларимизни изҳор этамиз-у, лекин ўша хатоларни тўғирлаш учун аниқ амалий ҳаракат қилиб кўрмаймиз. Мана шундай кайфиятни ўзгартириш вақти келмадимикин деган ўйда, мазкур тошлавҳани ўзгартириш учун уриниб кўришга аҳд қилдим. Бу ишнинг натижаси қандай бўлиши ҳали ўзимга ҳам қоронғу эди.", деб ёзади Хушнудбек Телефон ёки оғзаки мурожаатдан бир иш чиқишига ишонқирамаган ташаббускор, "Трастбанк” бошқарув раисига ёзма хат ёзишга қарор қилган. 9 апрель куни у хатни, иловани ва фотосуратни "Трастбанк” биносига олиб бориб, девонхонага топширди.
18 апрель куни, яъни орадан 9 кун ўтиб шахсан "Трастбанк” Бошқарув раиси Хаджизадаев Шерзод Рафатовичнинг ўзи хат муаллифига қўнғироқ қилди. Раисдан шу масала бўйича кўришиш таклифини олган Худойберидиев эртаси куни келишилган вақтда "Трастбанк”га борди ва у ерда Бошқарув раиси Шерзод Рафатович билан кўришди.
Хушнудбекнинг айтишича раис уни илиқ кутиб олган ва банк номидан ҳамда шахсан ўзининг номидан банк имижини ўйлаб хат ёзгани учун унга миннатдорчилик билдирган. Банк раҳбарининг маълум қилишича, ушбу хат юзасидан махсус йиғилиш ўтказилган ва хатони тезда бартараф этиш лозимлиги ҳақида тегишли кўрсатмалар берилган. Суҳбат якунида Шерзод Рафатович миннатдорчилик белгиси сифатида Худойбердиевга "Трастбанк” номидан эсдалик пакетини совға қилди.
"Ростини айтсам, воқеалар ривожи бундай бўлишини умуман кутмагандим. Катта бир банкнинг раисини шахсан ўзи телефон қилиб (бирон ўринбосари орқали чақиртирса ҳам бўларди), ўзи кутиб олиб, миннатдорчилик билдириб, ҳурмат бажо келтирганлари таҳсинга сазовор. Гап берилган эсдалик совғасида ҳам эмас. Чунки бошиданоқ мен бирон манфаат кўзламаганман. Гап муносабатда. Гап қилинган эътиборда. Гап самимийликда. Яна ҳам қувонарли томони ва энг асосийси тез кунларда банк олдидаги ўша тошлавҳа тўғирланди.
Бугун атайин бориб, яна суратга олиб келдим. Эсдалик сифатида. Қачонлардир мана шу тошлавҳадаги имловий хатолар менинг ташаббусим билан тўғирланган деб эслаб юраман." деб ёзади Хушнудбек ўз блогида.
