Главная » 2014»Fevral»14 » Toshkentda 75 yashar otaxon kompyuter savodxonligi kursini tugatdi
16:05
Toshkentda 75 yashar otaxon kompyuter savodxonligi kursini tugatdi
"Beshikdan to qabrgacha ilm izla” degan hikmat shu kunlarda Toshkentda o‘z amaliy ifodasini topdi. 75 yashar otaxon "Kompyuter savodxonligi asoslari” kursini o‘qib tugatdi. Bu haqda Liliya Nikolenko Facebook’dagi sahifasida ma’lum qilgan. Postda aytilishicha, qariya Germaniya Xalq universitetlari Assotsiatsiyasi Xalqaro hamkorlik institutining (DVV international) O‘zbekiston filiali qoshidagi o‘quv kursini tugatgan.
Assotsiatsiya vakili unga kursni bitirganlik haqidagi sertifikat hamda esdalik sovg‘asini topshirayotib, agar Excel’ni ham o‘zlashtirsa, otaxonga kompyuter hadya etilishini ta’kidlagan.
Mazkur yangilikni ijtimoiy tarmoqda ma’lum qilgan Liliya Nikolenko esa "Balki bu otaxonga kompyuter sovg‘a qiladigan biror savobtalab ishbilarmon topilib qolar. Ehtimol, unga bir umrlik cheksiz internet hadya etuvchi provayder ham chiqib qolar”, — deya umid bildirgan. Shunday qiluvchilar bo‘lsa, ular haqida o‘zi ajoyib hikoya yozishga va’da bergan...
Postga yozilgan izohlarda bu xabar xususida asosan iliq gaplar aytilgan. Internet foydalanuvchisining yozishicha, DVV international O‘zbekiston filiali o‘zi o‘qitish ishlarini olib bormaydi, balki shunday o‘quv markazlarini qo‘llab-quvvatlaydi. Otaxon esa poytaxtdagi "Korchalon” o‘quv markazida kompyuter kursini tugatganligi, bu dargohda o‘qish istagidagi pensionerlarga imtiyozlar mavjudligini qayd etib o‘tgan.
Yana bir izoh muallifi esa agar o‘zi bu yil o‘qishga kira olsa, otaxonga cheksiz internetni o‘z hisobidan o‘tkazib berishni va’da qilgan.
Kompyuter bo‘yicha o‘qigan otaxonning ism-sharifi va boshqa ma’lumotlar berilmagan.