Фольклор йўналишида ижод қилиб келаётган «Сурхон» гуруҳи турк хонандаси Таркан ижросидаги «Шимарик» қўшиғини куйлашга қарор қилди...
Айни кунларда гуруҳ йигитлари қўшиқни ёзиш улгурган бўлса ҳам, тингловчилар эътиборига ҳавола этишга шошилишмаяпти. Чунки тайёр қўшиқни биринчи бўлиб Тарканнинг ўзи эшитиши керак экан. Айнан мана шу муаммоларни ҳал қилиш ва ўзбеклаштирилган қўшиққа баҳо олиш учун шу ойнинг сўнгги кунларида гуруҳ вакиллари Таркан билан учрашиш учун Туркия сафарига кетишади.
«Мазкур қўшиқни Таркан қандай куйлаган бўлса, ўзгартирмасдан қайта куйладик. Фақатгина бизнинг минталитетимизга тўғри келмайдиган айрим жойларини олиб ташлашга мажбур бўлдик. Хонанданинг продюссери эса қўшиқни борича куйлашимизни талаб қиляпти», – дейди гуруҳ вакиллари. Кутилаётган учрашувда айнан шу масалага ҳам ойдинлик киритилади.
Дарвоқе, учрашув давомида икки миллат хонандасининг дуэт куйлаши ҳам режалаштирилган. Икки мусиқий йўналиш уйғунлиги қай даражада муваффақиятли чиқққанини дуэт тайёр бўлгач тингловчилар баҳолашади.
Эслатиб ўтамиз, Таркан ижросидаги "Шимарик" (Simarik) қўшиғи 1997 йилда сотувга чиққан "Ölürüm Sana" (Жоним қурбон) мусиқий албомидан ўрин олган бўлиб, бутун дунёда катта муваффақият қозонган. Биргина Туркиянинг ўзида албом 4,5 млн. нусхада сотилган ва Европа хит-парадларида етакчи ўринларни эгаллаган.