Главная » 2013»Aprel»15 » «Реал» Чемпионлар лигаси ярим финалида «Барселона» билан тўқнашувдан қутилиб қолди
01:02
«Реал» Чемпионлар лигаси ярим финалида «Барселона» билан тўқнашувдан қутилиб қолди
«Барселона» Европа Чемпионлар лигаси ярим финалида Мюнхеннинг «Бавария» жамоасига қарши баҳс олиб боради. Мадриднинг «Реал» ва Дортмунднинг «Боруссия» жамоалари иккинчи ярим финал жуфтлигини юзага келтиришди. Чемпионлар лигаси ярим финалига қуръа ташлаш маросими 12 апрель, жума куни УЕФАнинг Ньон (Швейцария)даги бош қароргоҳида ўтказилди. Тадбир УЕФА расмий сайтидан тўғридан-тўғри трансляция қилинди.
Чорак финалда «Реал» Туркиянинг «Галатасарай» жамоасини мағлуб этган, «Барселона» эса Франциянинг «ПСЖ» жамоаси устидан ғалаба қозонган, «Боруссия» Испаниянинг «Малага» жамоасидан устун келган бўлса, «Бавария» Италиянинг «Ювентус» клубидан кучлироқ бўлиб чиққанди.
Ярим финалнинг дастлабки ўйинлари 23 ва 24 апрель кунлари мос равишда Мюнхен ва Дортмундда ўтказилади. Жавоб ўйинлари эса 30 апрель ва 1 май кунлари Барселона ва Мадридда ташкил этилади. Чемпионлар лигасининг 2012/2013 йиллар мавсуми финал учрашуви 25 май куни Лондондаги «Уэмбли» стадионида ўтказилади.
Аввалроқ, Ньонда Европа Лигаси ярим финал ўйинларига қуръа ташлаш маросими ҳам ўтказилган эди. Унга кўра, финал йўлланмаси учун Истанбулнинг «Фенербаҳче» жамоаси Лиссабоннинг «Бенфика»сига қарши, Лондоннинг «Челси» клуби эса Швейцариянинг «Базел»ига қарши майдонга тушадиган бўлди.
