XAYRIYA KONSERTI O'ZBEK SAN'ATI NAMOYONDALARINI YANA EZGULIK TAMANNOSI-LA BIRLASHTIRDI! Barchamizga ma’lumki o’zbek xalqi azal-azaldan mehr-muruvvat, oliyjanoblik, saxovat va oqibatli bo’lishdek yuksak fazilatlari bilan nom qozongan. Kattalarga hurmat, kichiklarga izzat kabi ezgu xislatlar ham xalqimiz qon-qoniga singib ketgan. kuni-kecha poytaxtimizdagi Olmazor tumanida joylashgan "Urush va mehnat faxriylari uchun Respublika pansionatida yoshi ulug’ otaxonu onaxonlar uchun Toshkent axborot texnologiyalari universiteti "Kamolot”YoIH boshlang’ich tashkiloti tomonidan xayriya tadbiri tashkil etildi. Harakatning "Ezgu ishda birgamiz!” loyihasi doirasida tashkil etilgan mazkur tadbir TATU "Telekommunikatsiya texnologiyalari” fakultetining faol talabalari tomonidan "Qariyalarni qadrlash oliy saodat” shiori ostida uyushtirildi. Ma’naviy-ma’rifiy dastur davomida "Sabo” vokal-cholg’u ansambli, "Shodlik” doirachilar guruhi, shuningdek bir guruh el ardog’idagi san’atkorlar O’zbekistonda xizmat ko'rsatgan artist Abdurashid Yo'ldoshev, "Nihol" mukofoti sovrindorlari Gulasal Abdullayeva, Zakariyo Fanoiy, Sherzod BEK, xushovoz xonandalar Vohidjon Isoqov, Jasur Mavlonov, Bobur Boymurodov, A'zam Xolyorov, Jomiy Abdurahmonovlar o'z kuy-qo'shiqlari bilan tadbirga bayramona shukuh va ko'tarinki kayfiyat bag'ishlashdi. Pansionatda o’zgalar parvarishiga muhtoj yolg’iz keksalar, faxriylarga sovg’a-salomlar ulashildi.
