Австриянинг «Рапид» футбол клуби аъзоси Маркус Ҳайкинен Тошкентнинг «Пахтакор» жамоасига ўтиши мумкин. Бу ҳақда Австриянинг Laola1.at спорт нашри хабар бермоқда.
Бироқ, «Пахтакор» матбуот хизмати клубнинг бундай мақсади борлигини инкор этди. Жумладан, Бекзод Назаровнинг айтишича, агар клуб қайсидир футболчига қизиқиш билдирганида унга ўша футболчи ҳақида маълумот тўплаш топширилган бўларди. - Бироқ менга бундай топшириқ берилгани йўқ, дейди Назаров.
Асли Швецияда туғилган Маркус Ҳайкинен фаолияти давомида бир қатор фин клубларида, шунингдек, Англиянинг «Портсмут», «Лутон», Шотландиянинг «Абердин» клубларида тўп сурган. 2007 йилдан бери Австриянинг «Рапид» клубида ўйнаб келади, деб ёзади Kun нашри. Маркус Ҳайкинен ўз вақтида Финландия ёшлар ва олимпия терма жамоаларида ўйнаган, 2002-2011 йиллар давомида эса Финландия миллий терма жамоаси сафида 61 учрашувда майдонга тушган.
ЎзПФЛ регламентига кўра, футбол бўйича Ўзбекистон Олий Лигасида иштирок этаётган жамоалар таркибида 4 хорижлик (1 нафар осиёлик ва 3 нафар осиёлик бўлмаган) футболчи заявка қилиниши мумкин. 2013 йилги мавсум учун «Пахтакор» грузиялик Кахи Махарадзе, арманистонлик Жора Оганесян ва черногориялик Боян Миладиновични рўйхатдан ўтказган ва осиёлик бўлмаган хорижлик футболчилар лимитини тўлдириб бўлган.
