Главная » 2014 » Aprel » 2 » Oculus’ni Facebook’ka sotgani uchun uning yaratuvchisiga tahdidlar ko‘paydi
22:22
Oculus’ni Facebook’ka sotgani uchun uning yaratuvchisiga tahdidlar ko‘paydi
Oculus VR kompaniyasining asoschilaridan biri Palmer Laki so‘zlariga ko‘ra, kompaniyani sotish bo‘yicha Facebook bilan kelishganidan keyin o‘ldirishlarini aytib unga juda ko‘p tahdid qilishgan. Bu haqda Ars Technica nashriga tayanib TJournal xabar bermoqda.
Joriy yilning 26-martida Mark Sukerberg 2 milliard dollar evaziga Oculus VR kompaniyasini sotib olayotganligini ma’lum qilgan edi. Bunga turlicha munosabatlar bo‘ldi, lekin ayrimlar hatto po‘pisa qilishgacha ham borib yetishdi. Oculus VR asoschisi Palmer Lakining aytishicha, kompaniya xodimlariga qo‘ng‘iroq qilib, o‘zlariga va oila a’zolariga suiqasd uyushtirish xavfi bilan tahdid qilishgan.
Reddit sayti foydalanuvchilari bilan bo‘lgan muloqotda Lakining ta’kidlashicha, kompaniyaning sotilishi haqidagi xabardan qattiq ta’sirlangan kishilar shunchaki yetarli axborotga ega emaslar. U Game Informer jurnaliga bergan intervyyusi chog‘ida ham Oculus VR vakillari loyihani eng boshidan kuzatib kelayotgan muxlislar norozi bo‘lishlarini bilganliklari, ammo salbiy tasavvurlar juda keng tarqalib ketganligini ta’kidlaydi.
Afsonaviy Doom va Quake o‘yinlari yaratuvchisi Jon Karmak ham o‘tgan yilning avgustidan buyon Oculus VR kompaniyasida ishlab kelmoqda. 30-mart kuni e’tirof etishicha, kompaniyaning sotilishidan u ham bexabar qolgan.
“Shaxsan meni muzokaralarga jalb etishmagan. Men Mark Sukerberg bilan texnologiyalar haqida gaplashib kunimni o‘tkazdim, keyingi haftada esa u Oculus’ni sotib olganidan xabar topdim”, – deydi Jon Karmak.