Главная » 2013»Yanvar»5 » O'zbekistonda 15 mingga yaqin yo'nalishsiz taksi yangi qoidalarga javob beradi
08:57
O'zbekistonda 15 mingga yaqin yo'nalishsiz taksi yangi qoidalarga javob beradi
Bugungi kunda 15 mingga yaqin avtotransport vositasi talab doirasida jihozlangan. Shuningdek, yo'nalishsiz taksilar uchun 230 ga yaqin maxsus to'xtab turish joylari qurilib foydalanishga topshirilgan. Bu haqda O'zbekiston avtomobil va daryo transporti agentligining bo'lim boshlig'i Tohir Jamolxodjaev “Yo'nalishsiz taksilar faoliyatini tartibga solish borasida amalga oshirilgan ishlar natijalari, yutuqlar va rejalar” mavzuida o'tkazilgan matbuot anjumanida ma'lum qildi. Uning so'zlariga ko'ra, mamlakatda yo'nalishsiz taksilar faoliyatini tartibga solish bilan bog'liq islohotlar, jumladan, Vazirlar Mahkamasining 2011 yil 18 maydagi "Yo'nalishsiz taksilar faoliyatini tartibga solish chora- tadbirlari to'g'risida"gi 139-sonli qarori aholiga sifatli va xavfsiz taksi xizmatini tashkil etish maqsadiga qaratilgan. Ushbu qaror bilan taksilar uchun yagona tanish belgilari va ularning ishlarini tashkil etishga qo'yiladigan talablar to'g'risidagi nizom tasdiqlanib, unda O'zbekiston hududida faoliyat ko'rsatadigan taksilarning tashqi ko'rinishi va ichki axborot jihozlanishiga doir, shuningdek, taksi haydovchilariga qo'yiladigan yagona talablar belgilandi. Yagona tanish belgilari transport oqimida avtotransport vositasining ajralib turishini va tanilishini ta'minlash uchun mo'ljallangan bo'lib, yo'lovchilarni taksida tashish bilan shug'ullanuvchi barcha tashuvchilar uchun majburiy hisoblanadi. Qaror ijrosini ta'minlash doirasida, eng avvalo, aholiga va tashuvchilarga mazkur hujjatning mazmun- mohiyatini etkazishga qaratilgan tadbirlar o'tkazildi — respublikaning barcha shahar va tumanlarida avtokorxonalarning 44 mingdan ortiq rahbar va haydovchilari ishtirokida 720 dan ortiq seminar-yig'ilishlar, uchrashuvlar o'tkazildi, 50 mingdan ortiq tushuntirish beruvchi bukletlar tarqatildi, ommaviy axborot vositalari orqali ko'rsatuv va eshittirishlar tashkil qilindi, gazeta va jurnallarda maqolalar chop etildi, Agentlikning veb-saytida shu masalaga oid ma'lumotlar berib borilishi yo'lga qo'yildi. Jihozlanmagan va litsenziyaga ega bo'lmagan holda noqonuniy “kirakashlik” bilan shug'ullanayotganlarga nisbatan qonun doirasida choralar ko'rish maqsadida 2012 yilda O'zbekiston Respublikasi IIV YHXBB va Davlat soliq qo'mitasi bilan birgalikda 3979 ta qo'shma reyd o'tkazilib, aniqlangan qoidabuzarliklar bo'yicha hujjatlar rasmiylashtirilgan va tegishli jazo choralari ko'rish uchun soliq organlari taqdim etilgan. Natijada, 41377 ta qoidabuzarlik bo'yicha 5661,0 mln. so'm jarima undirildi. Ayniqsa, avtotransport xizmati ustidan jamoat nazoratini o'rnatishda Agentlik tomonidan joriy etilgan “SMS orqali ma'lumotlar bazasi bilan aloqa” interaktiv xizmati juda qo'l kelmoqda. Tabdirda ta'kidlanishicha, qaror ijrosini ta'minlash borasida Samarqand viloyatida amalga oshirilayotgan ishlar alohida e'tiborga molik bo'lib, viloyatida belgilangan talablar asosida jihozlangan yo'nalishsiz taksilar soni bugungi kunda deyarli 2,5 mingtaga yaqinlashgan. Shu bois Agentlik tomonidan Vazirlar Mahkamasi bilan kelishilgan holda 2013 yilning birinchi yarim yilligida Samarqand shahrida namunaviy seminar-yig'ilishni o'zkazish va Samarqand viloyati tajribalarini respublikadagi boshqa viloyatlarda ham keng joriy etish rejalashtirilmoqda. Ushbu seminar- yig'ilishga barcha viloyat hokimlarining o'rinbosarlari, tashuvchilar rahbarlari va matbuot vakillarini jalb etish rejalashtirilmoqda. Shu kuni tadbirda Agentlikning turli yo'nalishlar bo'yicha mutaxassislari, boshqa mutasaddi idoralar vakillari ham ishtirok etib, jurnalistlarni qiziqtirgan savollarga batafsil javob berdilar, deya xabar beradi O'zbekiston avtomobil va daryo transporti agentligining axborot xizmati.
