Главная » 2014 » Fevral » 26 » Nexia va Matiz’ni Qozog‘istonda sotish masalalari muhokama qilindi
08:57
Nexia va Matiz’ni Qozog‘istonda sotish masalalari muhokama qilindi
12-fevral kuni Qozog‘iston poytaxti Ostonada O‘zbekistonda ishlab chiqarilgan avtomobillarni Qozog‘iston bozoriga olib kirish masalasi bo‘yicha muzokaralar bo‘lib o‘tdi. Bu haqda O‘zbekiston Tashqi iqtisodiy aloqalar, savdo va investitsiyalar vazirligi matbuot xizmati xabariga asoslanib “Kun” nashri ma’lum qildi. “Gazeta.uz”ning yozishicha, O’zbekiston delegatsiyasiga vazirning birinchi o‘rinbosari Akmal Kamolov rahbarlik qilgan bo‘lsa, Qozog‘iston delegatsiyasiga sanoat va yangi texnologiyalar vazirining birinchi o‘rinbosari Albert Rau boshchilik qilgan.
Uchrashuvda Qozog‘iston tomonidan texnik ko‘rsatkichlar bo‘yicha yengil avtomobillarni mamlakat hududiga olib kirish bo‘yicha 2014-yil 1-yanvardan joriy etilgan cheklovlar yuzasidan “batafsil va konstruktiv” fikr almashilgan.
Qozog‘iston hukumatining 2013-yil 25-dekabrdagi qarori bilan joriy etilgan ushbu cheklovlar natijasida O’zbekistonda ishlab chiqarilgan Nexia va Matiz avtomobillari Qozog‘istonga ortiq olib kirilishi mumkin bo‘lmay qolgan edi.
O‘zbekiston tomoni uchrashuv vaqtida ushbu talablar “rasmiy ogohlantirishlarsiz, oldindan maslahatlashmasdan va moslashish uchun hech bir fursat qoldirmasdan” joriy etilganini ma’lum qilgan.
Vazirlik matbuot xizmati xabariga ko‘ra, muzokaralarda “tomonlarning ushbu masalani o‘zaro maqbul yechimlarini topishga va o‘zaro savdo uchun ijobiy shart-sharoitlarni saqlab qolishga tayyor ekanliklari” bildirilgan.
Muzokaralar yakunida Qozog‘iston tomoni qisqa muddat ichida O’zbekiston delegatsiyasi tomonidan qo‘yilgan masalalarni ko‘rib chiqish va natijalardan boxabar qilishga rozi bo‘lgan.
