Икки британиялик Лондон метросининг 270 та бекатини рекорд даражада қисқа фурсатда айланиб чиқди.
Рекорд ўрнатиш учун Жефф Маршалл ва Энтони Смитга 16 соат 20 дақиқа ва 27 сония керак бўлган. Улар “Хитроу, терминал5” бекатида финишга етиб келишди. Бу билан 2011 йилдаги 16 соат 29 дақиқа ва 13 сониялик рекорд янгиланди. Ҳозирга қадар видеопродюсер Маршалл барча метро бекатларини қисқа вақт ичида айланиб ўтишга 25 марта уриниб кўрди. “Рекорд ўрнатиш учун профессионализм керак. Сиз поезддан тушиб, бошқа йўналишга қараб югуришингиз керак бўлади. Шунинг учун яхши жисмоний тайёргарлик ва поездлар жадвалини билиш ҳам жуда муҳим”, - дейди Маршалл журналистларга. Лондон метроси поездлари куннинг турли пайтида турли тезликда юради. Баъзида поездни кутиш вақти 15 дақиқани ташкил этиши мумкин. Бундан ташқари, дунёдаги энг кекса Лондон метросида мунтазам равишда таъмирлаш ишлари ҳам ўтказиб турилади. Маршаллнинг сўзларига кўра, уларга 16 август куни метро узилишларсиз ишлаб тургани ҳам катта ёрдам берган.
