Главная » 2013»Fevral»12 » Германияликлар ўзбек ошини сеҳрли таом деб аташди
00:17
Германияликлар ўзбек ошини сеҳрли таом деб аташди
Германиядаги Заарланд университетида "Ўзбекистон ошхонаси – Ўзбекистон билан кун” мавзуида маданий тадбир бўлиб ўтди. Ўзбекистон Республикасининг Германия Федератив Республикасидаги дипломатик ваколатхонаси томонидан ташкил этилган ушбу лойиҳа доирасида нафақат ўзбек халқининг пазандалик маҳорати ва анъаналари, балки мамлакатимизнинг сайёҳлик борасидаги салоҳияти ҳам намойиш этилган.
"Жаҳон” ахборот агентлигининг хабар беришича, мазкур ажойиб ва ўзига хос тадбирни ташкил этишдан кўзланган мақсад Ўзбекистоннинг бой маданияти, урф-одатлари ва қадриятлари, мамлакатимизнинг фан ва маданият, маданий интеграциялашишга кўмаклашиш ва давлатлараро алоқаларни мустаҳкамлаш борасида қўлга киритган ютуқлари билан Германия жамоатчилигини таништиришдан иборат эди. Меҳмонларга Ўзбекистоннинг бой маънавий ва маданий мероси, шунингдек, жаҳон цивилизацияси ва фан тараққиётига беқиёс ҳисса қўшган бобокалонларимиз – Абу Али ибн Сино, Аҳмад ал-Фарғоний, Имом ал-Бухорий, Абу Райхон Беруний каби дунёга машҳур аждодларимизнинг ҳаёти ва фаолияти ҳақида батафсил маълумот берилган. Анжуман доирасида Ўзбекистоннинг замонавий ривожланиши, улкан иқтисодий, сармоявий ва сайёҳлик салоҳиятига бағишланган ахборотлар ҳам тарқатилди. "Бугунги кунда университетимизда юздан зиёд миллатлар вакиллари таҳсил олади. Биз турли халқлар ва мамлакатлар маданиятига бағишланган бу каби тадбирларни мунтазам ўтказиб борамиз. Зотан, улар халқлар ва миллатлараро дўстлик ришталарини мустаҳкамлашга хизмат қилади. Фикримча, Ўзбекистоннинг сайёҳлик салоҳияти ва пазандалик санъатига бағишланган мазкур тадбир юксак савияда ташкил этилди”, - деди Заарланд университети халқаро алоқалар департаменти ходими Юрий Яминжак. Қайд этиш жоиз, мазкур олий ўқув юрти Германиядаги энг йирик университетлардан бири бўлиб, у дунёнинг 45 мамлакатидаги 60та таълим маскани билан ҳамкорлик қилиб келади. Университетда қарийб 19 минг талаба таҳсил олади. Улардан 2,5 мингтаси хорижлик талаба, жумладан, бу ерда 8 нафар ўзбекистонлик талаба билиб олади. Ўзбек миллий таоми ошнинг меҳмонларга улашилиши тадбирнинг энг кульминацион нуқтасига айланди. Паловдан татиб кўрган талабалар шу вақтгача бундай мазалаи таом емаганлариини тан олишди. Уларнинг айтишича, ош бошқа овқатларга умуман ўхшамайди ва унда қандайдир сир бор.
