Германиянинг Хаген шаҳрида 92 ёшли собиқ эсэсчи Сирт Брейнс устидан суд жараёни бошланди. "Associated Press” тарқатган хабарга кўра, у Нидерландия қаршилик ҳаракатининг аъзоси Алдерт Клаас Дейкиманинг қотиллигида айбланмоқда.

Тергов маълумотларига кўра, 1945 йилда эсэсчи ўзининг хизматдоши билан бирга нидерландиялик махфий ташкилот аъзосини ташландиқ фабрикага олиб борган ва ўлдирган.

Айтиш жоизки, ушбу суд жараёни собиқ нацистлар устидан олиб борилган шов-шувли жараёнларнинг охиргиси бўлади. Бундан олдин 2010 йилда Нидерландияда хизмат қилган собиқ СС аскари 90 ёшли Хайнрих Бере 1944 йили уч нафар голландиялик фуқарони ўлдирганлиги учун бир умрлик қамоқ жазосига ҳукм қилинганди.

Маълумотнома.

Даставвал СС кучлари Адольф Гитлерни қўриқлаш учун мўлжалланган. Махсус хизмат ходимлари штурмчи отрядлар таркибига кирган. 1934 йилдан бошлаб СС штурмчи отрядлар таркибидан ажралиб чиқади ва энди шахсан Гитлер ва рейхсфюрер Генрих Гиммлерга бўйсунади.

ССга кўплаб ҳарбий жиноятлар, шу жумладан инсонийликка қарши жиноятларни содир этиш айби қўйилган. Нюрнберг трибунали "СС аъзолари сафига расман кирган барча шахсларни” жиноятчи сифатида тан олган. Бироқ уларнинг айримлари одил суддан қочишга муваффақ бўлган.