Главная » 2014 » Aprel » 3 » FIFA Ukrainadagi inqiroz sabab Rossiyani JCh—2014 dan chetlatmasligini ma’lum qildi
20:56
FIFA Ukrainadagi inqiroz sabab Rossiyani JCh—2014 dan chetlatmasligini ma’lum qildi
Futbol bo‘yicha Rossiya terma jamoasidan 2014-yilgi jahon chempionatida ishtirok etish huquqini olib qo‘yish bo‘yicha FIFAda hech qanday rejalar yo‘q, deb xabar bermoqda The Wall Street Journal. Bu haqda tashkilot bosh kotibi Jerom Valkening AQSh senatorlariga yo‘llagan maktubida so‘z boradi, deya yozadi “Kun”. Avvalroq, AQShning Respublikachilar partiyasi vakillari — Mark Kerk va Den Kouts Rossiya terma jamoasini Braziliyadagi JCh—2014 bahslaridan chetlatish va undan 2018-yilgi jahon chempionati mezbonligini olib qo‘yishni FIFAga taklif qilgan edi.
Valkening so‘zlariga ko‘ra, futbol bo‘yicha mamlakat terma jamoalari o‘z mamlakatlari rahbariyati amalga oshirayotgan harakatlar uchun javob bera olmaydi.
O‘z navbatida Den Kouts bunga javoban FIFA “Ukrainadagi siyosiy inqiroz va Qrim anneksiyasi uchun Rossiyani jazolashdan bosh tortib, o‘z tarixidan yuz o‘girmoqda”, deb ta’kidlagan.
Senatorning eslatishicha, futbol bo‘yicha Yugoslaviya terma jamoasi “mamlakatning Bolqon urushlaridagi huquqqa zid harakatlari sabab” 1992-yilgi Yevropa chempionati va 1994-yilgi jahon chempionati bahslaridan chetlatilgan edi.