Главная » 2013 » May » 5 » Facebook кириллча логотипни тақдим этди
12:21
Facebook кириллча логотипни тақдим этди
Facebook ижтимоий тармоғи кириллча логотипни тестдан ўтказишни бошлади. Компаниянинг Россиядаги вакили Варвара Фефилованинг «Лента.Ру»га берган маълумотларига кўра, ҳозирча «Фейсбук» деб ёзилган логотип ижтимоий тармоқнинг россиялик фойдаланувчиларидан беш фоизига кўринмоқда.
Варвара Фефилова компания нима учун ушбу логотипни синовдан ўтказаётгани ҳақидаги саволга жавоб беришга қийналди, бироқ, унинг қайд этишича, «бу шунчаки тест, имкониятлар/эҳтимоллардан бири, ФБ мунтазам ниманидир синовдан ўтказади ва кўпинча фойдаланувчилар буни сезмай ҳам қолишади». Айни вақтда, Фефилованинг таъкидлашича, «Фейсбук» логотипи яшаб кетиши ҳам аниқ эмас. Компания вакиласи бу каби логотип билан боғлиқ тестлар Facebook’нинг бошқа тилдаги вариантларида ҳам ўтказилган бўлиши мумкинлигини инкор этмади.
Ҳозирги кунда Facebook фойдаланувчилари ўз хоҳишларига кўра интерфейс тилини танлашлари мумкин. Бироқ, компания логотипи расман бошқа тилга таржима қилингани ҳолатлари шу вақтгача қайд этилмаган. Facebook’нинг рус тилидаги версияси 2008 йилда ишга тушган, 2013 йилнинг март ойи ҳолатига кўра унда тўққиз миллионга яқин россиялик фойдаланувчи бор. Жаҳоннинг энг йирик ижтимоий тармоғидан жами бир миллиард киши фойдаланади.
2012 йилнинг апрель ойида Facebook фотосуратлар билан ишлашга мўлжалланган ижтимоий тармоқ – Instagram’ни сотиб олган эди. 2012 йилнинг декабрида эса Instagram 25 хил тилдаги, жумладан, рус тилидаги интерфейсни тақдим этган.
