Тошкент марказидаги кўчалардан бири - Тарас Шевченко кўчасининг ўртасида хавфли чуқур пайдо бўлди. Daryo интернет-нашрининг хабар беришича, шу кўчадаги тамаддихоналардан бирида тушлик қилган сайт ўқувчиларидан бири ўнга яқин автомобилнинг шу чуқур сабаб хавфли вазиятга тушиб қолганига гувоҳ бўлган.
«Автомобилчилар чуқурни кўриши билан тормозни босишар, баъзи автомобиллар эса йўлнинг қарама-қарши қисмига чиқиб кетар эди», – деб ёзади Daryo. Шундай вазиятлардан бирида Nexia русумли машина чуқурга тушиб, ғилдирагидаги қалпоғи қарама-қарши тарафда турган такси олдига учиб тушган.
Нашрнинг ёзишича, кўчанинг чуқур пайдо бўлган қисмида тахминан бир ой аввал йўл остидан ўтган қувурларни таъмирлаш ишлари олиб борилган. Таъмирлаш ишлари тугаганидан сўнг кўчага қайтадан асфальт ётқизилган, бироқ, «бир ой ўтар-ўтмас янги асфальдан асар ҳам қолмади».
Эслатиб ўтамиз, Тарас Шевченко кўчаси шаҳар марказидаги нуфузли кўчалардан бири бўлиб, бу ерда замонавий уйлар, кўплаб қаҳвахона ва ресторанлар, савдо шаҳобчалари жойлашган.