Милиция ходимлари "Daryo" мухбирининг Жасорат монументини суратга олишига йўл қўйишмади. Бу ҳақда ушбу сайтнинг ўзи маълум қилган.
Тошкент шаҳар ҳокимлиги томонидан бир неча киши ва махсус техника жалб этилгани ҳолда монументни ювиш ишлари олиб борилаётганини кўрган сайт мухбири уни суратга олишга чоғланганда, тўрт нафар милиционер унинг олдига келган ва монументни расмга олиш мумкин эмаслигини айтган. Бунинг учун ҳокимиятдан рухсат олиш кераклигини уқтирган милиция ходимлари фотоаппаратни беришни ва расмларни ўчириб ташлашни талаб қилишган. Нима учун расмга олиш мумкин эмас, деган саволга эса улар аниқ жавоб айта олишмаган.
"Нима учун халқимиз жасорати шарафига шаҳримиз қоқ марказига ўрнатилган монументни расмга олиш мумкин эмас? Нима учун ҳокимият ходимларининг хайрли ишларини ёритиш, халққа етказиш мумкин эмас? Нима учун?", деб очиқ савол қолдирган "Daryo" сайти.
Эслатиб ўтамиз, худди шундай вазият "Газета" сайти билан ҳам юз берганди. Ўшанда Тошкент вилояти ҳокимлиги биноси пештоқини суратга олмоқчи бўлган сайт мухбири милиционерларнинг қаршилигига дуч келган.
