Главная » 2013 » Sentyabir » 4 » "Анжи" футболчи сотишдан энг кўп даромад олган клубга айланди
15:40
"Анжи" футболчи сотишдан энг кўп даромад олган клубга айланди
Махачқалъанинг «Анжи» жамоаси 2013 йил ёзида футболчиларни "сотиш”дан олган даромади бўйича жаҳонда биринчи ўринни эгаллади.
Бу ҳақда футболчилар трансфери ҳақидаги маълумотларни тўпловчи "Transfermarkt.de” сайти келтирган маълумотлар далолат бермоқда. Ёзги трансфер чоғида "Анжи” умумий қиймати 136,3 миллион евролик битимни амалга оширган. Клуб ўйинчиларни сотиб олишга қарийб 60 миллион евро сарфлаган.
Махачқалъа жамоаси энг кўп пулни бразилиялик ярим ҳимоячи Виллиан учун олган. Футболчи Лондоннинг "Челси” клубига 39 миллион еврога "сотилган”.
Ўйинчиларни "сотиш”дан олган даромадлари бўйича иккинчи ўринни "Тоттенхэм” клуби эгаллади, жамоа трансфердан 118 миллион евро ишлаб олган. Ушбу маблағнинг катта қисми ярим ҳимоячи Гарет Бейлни "Реал” клубига "сотиш”дан тушган. Эслатиб ўтамиз, футболчи Мадрид клубига 100 миллион еврога "сотилган” эди.
2013 йил ёзида трансферларга сарфланган харажатлари бўйича биринчи ўрин Франциянинг "Монако” клубига насиб этди. Ушбу жамоа россиялик ишбилармон Дмитрий Риболовлевга тегишли. Айтиш жоизки, "Монако” клуби ўйинчиларни сотиб олишга 166 миллион евро сарфлаган. 163,5 миллион евро сарфлаган "Реал” клуби иккинчи ўринни, ўйинчиларни 121,9 миллион еврога сотиб олган "Тоттенхэм” эса бу борада учинчи ўринни эгаллади.
Олдинлари трансферга кўп пул сарфлаб келган «Анжи» август ойи бошида клуб ўз стратегиясини ўзгартиргани ҳақида эълон қилган эди. Махачқалъаликлар "қиммат” ўйинчиларни сотишга, бюджетни сезиларли даражада қисқартиришга ва эътиборни асосан маҳаллий футболчиларни тайёрлашга қаратишга қарор қилган.
