Главная » 2013 » May » 2 » Андижон вилоятида автомобили бор хонадонлар сони сезиларли кўпайди
01:40
Андижон вилоятида автомобили бор хонадонлар сони сезиларли кўпайди
Сўнгги олти йил давомида Андижон вилоятида аҳоли даромадлари сезиларли даражада ўсган. Ўзбекистон Президенти Ислом Каримовнинг 26 апрель куни Халқ депутатлари Андижон вилояти кенгаши навбатдан ташқари сессиядаги нутқига кўра, «даромадларнинг асосий қисми, яъни, 54 фоизга яқини тадбиркорлик ҳисобидан изчил ошиб» бормоқда.
«Бу шахсан мен учун жуда катта аҳамиятга эга бўлган кўрсаткич. Бу рақам авваламбор Андижон аҳлининг ўз меҳнати, ўз тадбиркорлик фаолияти, ўз бизнеси ҳисобидан ўзини ва оиласини боқаётганининг яққол далили, такрор айтаман, бизнинг энг катта ютуғимиздир», – дейди Президент.
Президентнинг қайд этишича, Андижон вилоятида хонадонларнинг телевизор, холодильник, мебель билан таъминланиш кўрсаткичлари Ўзбекистондаги ўртача кўрсаткичдан юқори, автомобилларга эга бўлган хонадонлар сони эса сўнгги олти йилда ҳар 100та оилага нисбатан олганда, 19тадан 30тага етган.
«Эсингизда бўлса, совет даврида одамлар машина олиш учун ўн йиллаб навбатда турар эди. Менга қолса, ҳар юзта оилага юзта автомобиль тўғри келсаям, ёмон бўлмас эди», – дея қўшимча қилди Ўзбекистон Президенти.
«Ҳаётимизнинг маъно-мазмунини ўзгартириб бораётган бундай ютуқлар ҳақида гап кетганда, мен биринчи навбатда аёлларга муносиб турмуш шароити яратиб бериш тўғрисида гапиришдан ҳеч чарчамайман. Шахсан мен ҳар юзта хонадонда юзта кир ювиш машинаси бўлишини истардим», – деди Президент.
26 апрель куни бўлиб ўтган Халқ депутатлари Андижон вилояти кенгаши навбатдан ташқари сессиясида, шунингдек, Наманган вилоятининг Тўрақўрғон туманида қиймати 1 миллиард долларлик иссиқлик электр станцияси қурилиши, 2016 йилгача Ангрендан Фарғона водийсига томон 125 километрлик темирйўл қуриб битказилиши маълум қилинган эди. Шунингдек, сессияда ташкилий масала кўрилиб, Шуҳратбек Абдураҳмонов вилоят ҳокими этиб сайланган эди.
