Andijon viloyati Oltinko‘l tumani “Madaniy mehnat” mahallasida yashovchi Muhammadzulun Turg‘unov o‘z hovlisidagi o‘t-o‘lanlar orasidan noyob ilon topib oldi, deb xabar beradi 12news.uz. Bu ilonning boshqa o‘z turiga mansub sudralib yuruvchilardan farqi uning boshi ikkita edi.

Ikki boshli ilonning uzunligi 30 santimetrlar atrofida bo‘lib, juda harakatchan, qizig‘i, uning har ikkala boshidagi tillari bilan bir xil harakatlanadi.

Muhammadzulun aka dehqonchilik bilan shug‘ullanadi. U kishi noyob jonzotni bankaga solib, uning ichiga oziqlantirish maqsadida un solib qo‘yibdi.

“To‘g‘risi, hayvonlardan sigir, qo‘y va boshqa uy hayvonlarini qanday ovqatlantirishdan xabarim bor. Lekin, hech ilon boqib ko‘rmaganligim uchun uni qanday oziqlantirish menga muammo tug‘dirmoqda, — deydi u. — Bu topilmani ilm egalari bo‘lgan biologlar olib ketib, jiddiy o‘rganib chiqsalar yaxshi bo‘lar edi”.

Bu topilma biologlar uchun qiziq bo‘lishi tabiiy hol. Agar, ilonga ilmiy tadqiqot institutlari xodimlari qiziqish bildirsalar yanada yaxshi bo‘lar edi. Chunki, Muhammadzulun aka barchani hayron qoldirishi mumkin bo‘lgan yana bir voqeani aytib berdi. Bundan 45 yillar oldin u kishining otasi xuddi shu hovlida ikki boshli ilon borligini aytgan ekan.