Амир Хон. Бу ном Болливудда ҳурмат ва меҳр билан тилга олинади. Энг қизиғи, Амир Хон бетакрорлар ва беназирлар сафида етакчи! Қайсар, аммо худбин эмас. Қалтис ҳазиллари билан бошқалардан ажралиб туради.

Амир Хон бу йил ижодининг 25 йиллигини нишонлади. Илк бор 1988 йил «Қиёматдан қиёматгача» фильмида кўринган Амир бугун 48 ёшда.

— Рафиқангиз Киран Рао сизни ўзгартира олдими?

— Ўзгартирди! Лекин буни талаб қилгани йўқ. Унинг ўз олами бор, ҳеч қачон бу оламга эгалик қилишга интилмаганман. Биз ёш бола эмасмиз, муносабатларимизни ҳадеб муҳокама қилавермаймиз.

— Унинг продюсерлик фаолияти сизни қониқтирадими?

— Албатта, у ўз ишининг устаси. Истаса, яхши актриса бўлиши мумкин эди, аммо бундай қилмади. Киран ўз ўрнини биладиганлардан. Ҳозир фарзандимиз тарбияси билан банд. Шунинг учун унинг фаолиятида шиддат бироз камайган.

— Матбуот Хонларнинг муносабатлари ҳақида ёзмай қўйгани сизни таажжублантирмаяптими?

— (кулиб) Нимага бу менга таъсир кўрсатиши керак?.. Умуман, бу борадаги гап-сўзлар эскиргани учун шундай бўлаётгандир. Лекин Салмон ҳақида ҳалиям гапираяпсизлар-ку…

— Салмонда ҳамиша муаммо бор. Шунинг учун у ҳақда кўп гапирилади.

— Демак, қолган Хонларнинг муаммолари камайган!

— «Тезлик 3»дан қандай натижа кутаяпсиз?

— Ҳар доимгидек, аъло! Лекин ҳаммасини вақт кўрсатади. Адитья билан қадрдонмиз. У мени танлаганидан хурсандман.

— Сизни китобсевар дейишади…

— Ҳа, мутолаани яхши кўраман. Аммо айни пайтда севимли машғулотимдан бироз чекинганман. Буни тан олишим керак.

— Болливуд фильмларида сизнингча нима кўп-у, нима кам?

—  … Баъзида «туз», баъзида «шакар». Меъёр етишмайдигандек…

— Сизга нисбатан эътирозларни қандай қабул қиласиз?

— Жуда оддий. Аммо жавобсиз қўймайман. Биласизми, қизиққонлигим бор, ундан кечишнинг иложини тополмадим. Лекин эътирозларсиз яшаб бўлмайди, худди эътирофларсиз қийин туюлгани каби…

— «Амир Хон рад этишни яхши кўради», деган гаплар ҳақиқатга қанчалик яқин?

– … Бу масофани аниқ айтолмайман. Лекин танлашни маъқул кўраман. Ижодимни таҳлил қилсангиз, арзирли фильмларим бармоқ билан санарли. Мен ҳар доим юрагимга ва ақлимга таяниб иш қиламан, десам ёлғон бўлади. Эҳтиёж баъзида исталмаган фильмларда ишлашга ҳам мажбур қилади.

— 48 ёшда болаларча хато қилиш мумкинми?

— Албатта, худди 8 ёшли болакай катталарни ҳайратга солгани каби… Хатоларсиз яшаш қийин. Мен хатолардан узоқдаман деган одам ёлғон гапиради.

— Фильмдаги жуфтингиз сифатида кимни соғиндингиз?

— Жухини… У жуда малоҳатли ва ёқимтой. Рани билан ҳам ишлагим келади.