Англиянинг "Манчестер Юнайтед" футбол клуби бош мураббийи Алекс Фергюсон 26 йиллик меҳнатдан кейин истефога чиқишини эълон қилди.
Шонли давр
Клуб расмий сайтининг хабар беришича, Фергюсон қўли остида "МЮ" охирги марта 19 май куни "Вест Бромвич"га қарши ўйин ўтказади. 71 ёшли Алекс Фергюсон бошқаруви даврида яъни 1986 йилдан бери "Манчестер Юнайтед" 13 марта Англия чемпионлигини қўлга киритган. Бундан ташқари, икки марта Чемпионлар Лигаси, беш марта Кубок ва 10 марта мамлакат Суперкубоги, 4 марта лига кубоги, шунингдек кубок эгалари кубоги, УЕФА суперкубоги, қитъалараро кубок ва клублар ўртасидаги жаҳон чемпионатларида ҳам ғолиб чиққан. Премъер лигадаги 13-чемпионлик эса шу йилнинг 22 апрел куни "Астон Вилла" жамоаси майдонида бўлиб ўтган ўйинда, қизил иблислар 3:0 ҳисобида ғалаба қозонган баҳсда қўлга киритилди. Учала голни ҳужумчи Робин ван Перси киритди.
Осонликча қутулмайсиз...
Расмий маълумотларга кўра Фергюсон эндиликда клуб бошқаруви таркибида иш олиб боради. "Манчестер Юнайтед" жамоаси эгалари бўлмиш Глейзерлар оиласи мутахасиснинг раҳбарият сафида ишлашга рози бўлганидан ҳурсанд эканлигини билдириб ўтишди. Шотландиялик мураббий энди директорлар кенгашига киритилади ва жамоа элчиси вазифасини ўтайди.
Вақтида кетиш муҳим
Алекс Фергюсон ҳозир жамоани тарк этиш қулай вақтлигини тан олди. Унинг сўзларига кўра, жамоадаги холат энг юқори кўрсаткичга эришган паллада кетиш тўғри қарор бўлади. Ҳозир эса Манчестерда ана шундай вазият ҳукмрон, дейди Ферогюссон. "Мен бундай қарор қабул қилишдан олдин анча ўйладим, ва бу менинг учун осон бўлгани йўқ. Мен учун клубнинг яхши формада бўлиб турганида кетиш муҳим. Ҳозирги жамоанинг маҳорати ва ўйинчилар ёшидаги баланс анча йилларгача муваффақият қозониш гарови бўлиши аниқ. Ёш футболчиларни тайёрлаш тизими эса клубнинг ёрқин келажагига замин ҳозирлайди", — дейди Фергюсон. Фергюссон ўз оиласига, ўйинчиларга ва клуб раҳбарлари ҳамда мухлисларига чин дилдан миннатдорчилик билдирди.
Моуринью биринчи даъвогар Мадриднинг "Реал" жамоаси бош мураббийи Жозе Моуринью "Манчестер Юнайтед" жамоаси мураббийлигига бириничи номзод сиатида кўрилмоқда. Букмекерлик идоралари айнан унинг исмини тилга олишмоқда. Британиянинг William Hill букмекерлик идораси португалияликнинг имкониятини 1,8 коэффициент деб ҳисобламоқда. Иккинчи номзод "Эвертон" устози Дэвид Мойес, унинг коэффициенти 2,62га тенг. Учинчиси эса шу кунларнинг кахрамоналридан бири "Боруссия" Дормунд бош мураббийи Юрген Клопп. Шунингдек Манчестерга "Анжи"дан Гус Хиддинк, "МЮ"нинг ўзидан Райан Гиггз ва Россия термасидан Фабио Капеллоларнинг келиши тахмин қилинмоқда
