Аксиряпсиз, қизил
тошмалар тошди - демак
сизда қишки аллергия! Қишнинг совуқ кунларида баъзида юз, қўл, тананинг турли ерларига тошмалар, шишлар чиқади — яъни аллергия пайдо бўлади. Чунки бу вақтда организмдаги иммунитет тизими бироз сустлашади. Аллергия шунингдек, совуқ таом, совуқ ичимликлар ичганда, совуқ сувда чўмилганда юзага келиши мумкин. Тиббиётда бу тошмалар қаварчиқ дейилса, қадимда улар эшакеми деб юритилган. Ана шу мавзуда батафсил маълумот олиш учун Республика илмий- ихтисослашган аллергология
маркази олий тоифали шифокори,
аллерголог Қутбиддин Низомовга мурожаат қилдик. Қишда юзага келадиган
тошмалар аллергиями? — Ҳа, бу аллергия. Асосан ўрта ёшдаги кишиларда учрайди. У кичик-кичик қизил ёки катта-катта қаварчиқ кўринишида бўлади. Теридан бўртиб чиқади, шиш кўринишида, баъзи ҳолларда кўкимтир ёки кўкарганга ўхшаш бўлиши ҳам мумкин. Бундай аллергия вақтида тошманинг устки ва ён қисмлари қизиб туриши кузатилади. Ҳаво ҳароратининг пасайиши билан баъзи инсонларда тез- тез акса уриш, лабнинг қуриши, кўкариши, кўзнинг тинмай ёшланиши, тошмалар тошиб қичишиши каби ҳоллар кузатилади. Бу фақат совуқ қотишдан эмас, асабийлашиш, ошқозон- ичакдаги бузилиш ва шу каби жуда кўплаб ҳолатларда юзага келиши мумкин. Бундай инсонлар иссиқ жойга киришлари билан совуқда пайдо бўлган ғайритабиий тошмалар камаяди. Қон анализи таҳлил қилинганда, эозинофиллар миқдори шу билан бирга иммуноглобулин Е миқдори қисман ошиши кузатилади. СИНАБ КЎРИШ МУМКИН! Қўлингизнинг билак қисмига
муз бўлакчасини ёки сув
солиб музлаткичга қўйилган
шиша идишчани қўйиб, 5-10
дақиқа ушлаб туринг. Агар
шу вақт давомида билагингизда қаварчиқ
пайдо бўлса, қичишиш,
қизариш ёки ачишишни
сезсангиз, демак сизда
совуқдан аллергияга
мойиллик бўлиши мумкин. Эҳтиёт бўлинг! Аллергиянинг қандай тури
бўлишидан қатъи назар,
аллергияси бор инсонларга
биринчи ўринда асал
истеъмол қилиш мумкин
эмас. Чунки асал гул чангларини ўзида
мужассамлаштиради. Бу эса
аллергия қўзғатувчи кучли
восита ҳисобланади.
Спиртли ичимликлар
истеъмол қилиш ҳам аллергик ҳолатни
кучайтиради.
Аллергия қўзғаган вақтда
совуқ сувда чўмилиш тавсия
этилмайди. Шунингдек,
музқаймоқ, совуқ таом, совуқ ичимликлар, аччиқ,
шўр маҳсулотлар, қизил
рангли (шотут, помидор,
тарвуз, қулупнай, малинали
мурабболар, лавлаги)
мевалар, рангли ичимликлар, бўёқ қўшилган
маҳсулотлар, балиқ ва от
гўштидан тайёрланадиган
таомларни истеъмол қилмай
турганингиз маъқул.
Асалли, мурабболи чой, ёнғоқ, ерёнғоқ, писта каби
қуруқ меваларни истеъмол
қилмаслик лозим.
Турли ўтлардан тайёрланган
дамламаларни ичиш
аллергик ҳолатни кучайтириши мумкин, чунки
уларда аллергик хасталик
қўзғатувчи хусусиятлар
мавжуд.
Ўзида совуққа аллергия
борлигини сезган киши таркибида "В” витамини
бўлган кремларни суртиши
мумкин эмас. У аллергияга
мойилликнинг кучайишига
сабаб бўлади. СИЗ УЧУН ФОЙДА... Агар аллергияга
мойиллигингиз борлигини
билсангиз, ўзингизни
совуқдан сақланг. Совуқ об-
ҳавода имкон қадар кўчага
чиқмаган маъқул. Хонанинг ҳавосини алмаштириш учун
бир кунда бир марта
деразаларни очиш лозим.
Бундай вақтда синтетик
толали кийимларни кийиш
тавсия этилмайди. Пахтадан тикилган либос тананинг
"нафас олиши”ни
таъминлайди ва иссиқликни
бир маромда ушлаб туради.
Ювинишда атир совун, кир
совунлардан эмас, болалар учун мўлжалланган
совунлардан фойдаланган
маъқул. Уларнинг таркибида
аллергияга қарши хусусият
мавжуд.
Имкон қадар кўпроқ суюқлик ичинг. Бунда
қайнатилган сув ёки кўк,
қора чойдан бошқа
суюқликларни ичиш тавсия
этилмайди. Ҳидли чойлар
асло мумкин эмас. Минерал ва рангсиз сувларни ичган
мақсадга мувофиқ.
Парҳез сақланг. Мол
гўштидан тайёрланган
қайнатма шўрва сиз учун
айни муддао. Ширқовоқ, димлама қовоқ
ҳам жуда фойдали. ЭСЛАТМА! Аллергия қайтгач, кундаликда тайёрланадиган ҳар қандай таомни меъёрида ейиш мумкин. Аллергиянинг ҳар қандай кўринишида ўзингизча бирор бир дори воситасини ичишга шошилманг. Шунингдек аллергияга мойиллиги бўлган инсонларга "Аналгин”, "Аспирин”, "Цитрамон”, "Тримол”, "Баралгин”, "Пенцилин” гуруҳи антибиотиклари, Сульфаниламид
препаратлари ("Бисептол”, "Тисептол”, "Грасептол”, "Бактериум” суспензияси ва бошқалар), "В” витамини мумкин эмас. Ушбу дори воситалари шифокор тавсиясисиз қабул қилинса, аллергиянинг ўта хавфли турлари юзага келиши мумкин. Имкон қадар аллерголог мутахассисга мурожаат қилиб, унинг маслаҳатлари асосида даволанинг. Ушбу дориларни ўз билганча қабул қилиш, дори истеъмолидан юзага келувчи иккиламчи оғир аллергик (Токсикодермия, Квинке шишлари ва ҳатто Анафилактик шок сингари) хасталиклар юзага келиши мумкин.
|
