АҚШга "Немо" бўрони ёпирилди - 10 Февраля 2013 - SHERLAR.BIZ

АҚШнинг шимолий-шарқий ҳудудида кузатилаётган «Немо» кучли қор бўрони туфайли Нью-Йоркда барча авиақатновлар бекор қилинди, деб хабар беради "France-Presse” ахборот агентлиги.

Нью-Йорк маъмуриятининг маълум қилишича, кун ярмида "LaGuardia” ҳамда Нью-Жерси қўшни штатидаги "Newark” аэропортлари иш фаолиятини тўхтатган. "Жон Ф. Кеннеди” ҳаво дарвозаси эса кечки маҳалдан бошлаб барча қатновларни бекор қилган. Умумий ҳисобда қарийб 2300 авиарейс бекор қилинган. Бундан ташқари Бостон, Чикаго ва Вашингтон аэропортларида ҳам қатновлар амалга оширилмаган. АҚШда ураган боис жами 60 аэропорт вақтинча иш фаолиятини тўхтатгани эълон қилинган.

Мамлакат ҳукумати шимолий-шарқий штатлардаги аҳолини уйдан чиқмасликка ва имкон қадар кўчада автомобилда юрмасликка чақирган. Массачусетс штатидаги мактабларда дарслар бекор қилинган. Штат губернатори қор бўрони вақтида фавқулодда хизмат машиналаридан ташқари барча автомобиллар ҳаракатини тақиқлаган.
Кузатувчиларнинг сўзларига кўра, «Немо» урагани 46 сантиметрдан 76 сантиметргача бўлган баландликни ташкил этмоқда.

Баъзи прогонозларга қараганда, мазкур ураган АҚШ тарихида кузатилган энг кучли қор бўронларидан бирига айланиши мумкин.

Manba: Darakchi.uz