АҚШга сўнгги юз йил ичидаги энг кучли қор ёғди. Шу боис, Канзас ва Миссури штатларида фавқулодда ҳолат эълон қилинди. Полиция одамлардан имкони борича уйдан чиқмасликни сўрамоқда. Ҳозирча бу табиий ҳодиса оқибатида икки кишининг вафот этгани маълум.
Синоптикларнинг айтишларича, бу сўнгги юз йилликдаги энг кучли қорбўрон. У Колорадо орқали Иллинойсда кузатилди, Канзас ва Миссури штатларида эса авжига чиқди. Баъзи туманларда музли ёмғир ҳам ёғиб ўтди.
Қор ёққан ҳудудларда 60 миллион одам яшайди— бу эса АҚШ аҳолисининг бешдан бир қисми ҳисобланади. Канзаснинг Халқаро аэропорти ҳали ёпилмаган, аммо 90 фоиз рейслар бекор қилинган.
Маълумотларга қараганда, кучли қор оқибатида икки киши— бири Небраскда, яна бири Оклахомада вафот этган. Бу икки киши машиналари сирпанчиқ йўлга чиқиб кетганлиги ва автомобиль ҳалокати сабабли вафот этишган. Айни дамда автотрассаларни қордан тозалайдиган техникалар ишламоқда, аммо булар ҳам табиат инжиқликлари олдида ожизлик қилмоқда.
Метеорологларнинг маълумотларига қараганда, баъзи туманларда қорнинг баландлиги 45 сантиметрдан ошиб кетган. Бундай ҳодиса марказий штатларда 1912 йилдан бери содир бўлмаганлигини таъкидлашмоқда. Ўша йили метеокузатувлар тарихида энг совуқ қиш бўлган, ҳарорат минус 40 даражага тушган, совуқдан 47 киши вафот этган, машҳур Ниагара шаршараси ҳам ўшанда музлаб қолган эди.
Manba: Darakchi.uz
|
