2012DA14 астероиди Ернинг ёнгинасидан учиб ўтди - 16 Февраля 2013 - SHERLAR.BIZ

Жумадан шанбага ўтьар кечаси катталиги футбол майдонидек келадиган астероид Ерга рекорд даражада яқинлашди. 2012DA14 рақамли ушбу астероид сайёрамиздан чамаси 27 680 километр наридан учиб ўтди. Бу космик ўлчовлар учун жуда яқин масофа бўлиб, сунъий йўлдошлар ҳаракатланадиган масофадан ҳам яқин деганидир.
2012 йилда Испаниядаги Ла-Сагра обсерваторияси олимлари томонидан кашф этилган 2012 DA14 рақамли астероидининг катталиги 15 қаватли уйдек келади. Унинг оғирлиги 130 минг тонна, тезлиги соатига 28,1 минг км, сониясига эса 7,82 кмни ташкил қилди.
АҚШнинг аэронавтика ва фазони тадқиқ қилиш бўйича бошқармаси (NASA) тўғридан-тўғри эфирда диаметри 45 метр келадиган ушбу астероиднинг Ерга яқинлашишини жонли эфирда намойиш этди.
Астроном олимлар ва мутахассислар Австралиядаги астрономия обсерваторияси ҳамда Маршал номидаги Хантсвилладаги (Алабама штати) Маркази ёрдамида суратга олинган астероиднинг реал вақтдаги ҳаракатини шарҳлаб боришди.
Ернинг шарқий қисмидан туриб уни оддий биноклда кузатиш мумкин бўлди. Астероид нуқта бўлиб эмас, балки чизиқча шаклида намоён бўлди.

NASA қайд этганидек астероид Ерга, коинотдаги сунъий йўлдошларга ва Халқаро космик станциясига ҳавф туғдирмади.
Астероиднинг Ерга энг яқин келган нуқтаси тахминан Ҳинд океанида жойлашган Индонезиянинг Суматра ороли бўлди.

Олимларнинг қайд этишича катта ҳажмдаги астероидлар Ерга ҳар 40 йилда бир маротаба яқин келади. Уларнинг ерга тушиши билан боғлиқ ҳалокатлар ўртача ҳар 1200 йилда рўй беради.

NASA маълумотларига қараганда, айни дамда Ер орбитасида 1,3 мингта ҳавф туғдириши мумкин бўлган астероидлар мавжуд бўлиб, улар ердан унча узоқ бўлмаган масофада ҳаракатланмоқда.