Главная » 2013 » Noyabr » 22 » Dunyodagi smartfonlarning 81 foizi Android tizimida ishlashi ma’lum bo‘ldi
23:46
Dunyodagi smartfonlarning 81 foizi Android tizimida ishlashi ma’lum bo‘ldi
Joriy yilning uchinchi choragida Google’ning Android operatsion tizimida ishlaydigan 211,6 millionta qurilma sotildi. Bu haqda International Data Corporation tadqiqot agentligi hisobotiga tayanib, "Kommersant” nashri xabar berdi. Ayni paytda Android’ning smartfonlar uchun operatsion tizimlar bozoridagi ulushi 81 foizini tashkil qilmoqda — bu ushbu operatsion tizim uchun rekord ko‘rsatkich. Taqqoslash uchun, o‘tgan yilning shu davrida 139,9 millionta Android qurilmasi sotilgan, bu bozorning 74,9 foizini tashkil qilgan edi.
Android’ning asosiy raqobatdoshi bo‘lmish iOS’ning bozordagi ulushi bor-yo‘g‘i 12,9 foizni tashkil qilmoqda. Uchinchi chorakda sotilgan iOS-qurilmalar soni esa 33,8 milliontaga yetdi.
Ro‘yxatda Windows Phone o‘sishning eng yuqori darajasini namoyish qildi: ushbu operatsion tizimda ishlaydigan smartfonlar miqdori bir yil ichida 156 foizga oshgan. Hisobot davrida 9,5 million dona Windows operatsion tizimidagi smartfon sotilgan.
Smartfonlar bozoridagi narxlarga kelsak, ular bir yil ichida 12,5 foizga pasaygan. Smartfonlarning o‘rtacha narxi 317 dollarni tashkil qiladi. Biroq bunda Android va iOS smartfonlari narxlari o‘rtasida katta farq mavjud: uchinchi chorakda Google’ning operatsion tizimida ishlaydigan smartfonlarning o‘rtacha narxi 268 dollar, iOS’niki 635 dollar bo‘lgan.
